بی جے پی نے ہفتہ کے روز مغربی بنگال کی وزیر اعلی ممتا بنرجی کو چیلنج کیا کہ اگر انہیں اپنی جیت پر اعتماد ہے تو وہ صرف نندیگرام سے ہی انتخاب لڑنے کا اعلان کریں۔ اس پر ترنمول کانگریس نے پلٹ وار کرتے ہوئے کہا کہ بی جے پی سب سے پہلے وزیر اعلی کے عہدے کے لیے اپنے امیدوار کے نام کا اعلان کریں۔
بی جے پی کے قومی جنرل سکریٹری کیلاش وجے ورگیہ نے ایک ٹویٹ میں کہا کہ کیا بنرجی صرف نندیگرام سے ہی انتخاب لڑیں گی۔
اس کے جواب میں ترنمول کانگریس نے کہا کہ بی جے پی نندیگرام سے اپنے امیدوار اور وزیر اعلی کے امیدوار کے ناموں کا اعلان کرنے سے کیوں ڈر رہی ہے۔
بی جے پی نے ابھی نندیگرام سیٹ کے لیے اپنے امیدوار کا اعلان نہیں کیا ہے اور وزیر اعلی کے امیدوار کے بارے میں ان کا کہنا ہے کہ وہ اقتدار میں آنے کے بعد وزیر اعلی کا انتخاب کریں گے۔
بنرجی نے جنوری میں ایک ریلی میں اعلان کیا تھا کہ وہ نندیگرام سے انتخاب لڑیں گی۔
وجے ورگیہ نے اپنے ٹویٹ میں کہا کہ ممتا بنرجی نے نندیگرام سے انتخاب لڑنے کا اعلان کیا ہے ، لیکن انہوں نے یہ نہیں کہا کہ وہ صرف اس نشست سے ہی انتخاب لڑیں گی۔ اگر انہیں اپنی جیت پر اعتماد ہے تو انہیں یہ بھی اعلان کرنا چاہیے بصورت دیگر یہ سمجھا جائے گا کہ آپ نندیگرام پر اعتماد نہیں کرتیں۔
اسی دوران ترنمول کانگریس نے جوابی حملہ کرتے ہوئے ایک بیان میں کہا کہ بی جے پی نندیگرام سے اپنے امیدوار اور وزیر اعلی کے امیدوار کے نام کا اعلان کرنے سے کیوں ڈر رہی ہے۔
اس نے کہا بی جے پی کو پہلے اعلان کرنا چاہیے کہ وہ نندی گرام میں ممتا بنرجی کے خلاف کسے میدان میں اتارے گی۔ ہم ایک بڑی جیت حاصل کرنے والے ہیں۔
واضح رہے کہ مغربی بنگال میں اپریل، مئی میں اسمبلی انتخابات ہونے ہیں۔
