کیلاش وجئے ورگیہ کو زیڈ زمرہ کی سیکوریٹی کے ساتھ ساتھ مغربی بنگال کے دورہ کے موقع پر بلٹ پروف گاڑی بھی دی جائے گی۔ گذشتہ کچھ روز قبل ریاست میں بی جے پی کے قومی صدر جے پی نڈا اور کیلاش وجئے ورگیہ کے قافلہ پر حملے کے بعد مرکزی حکومت نے بی جے پی رہنما کو زیڈ زمرہ کی سیکوریٹی فراہم کرنے کافیصلہ کیا ہے۔
گذشتہ 4 روز قبل مغربی بنگال میں جے پی نڈا اور وجئے ورگیہ کے قافلہ پر پتھراؤ کیا گیا تھا۔ حملہ میں قافلہ میں موجود کاروں کو نقصان پہنچا اور بعض بی جے پی رہنما زخمی بھی ہوئے تھے۔ اس واقعہ کا ایک ویڈیوں بھی وائر ہوا جس میں سڑک پر ٹھہرے بعض لوگوں کو قافلہ پر پتھر پھینکتے ہوئے دیکھا گیا۔ بی جے پی نے حملہ کرنے والوں کو ترنمول کانگریس کے کارکن قرار دیا تھا تاہم ممبا بنرجی نے اس الزام کو مسترد کردیا تھا۔
مغربی بنگال میں بی جے پی کے انچارج وجئے ورگیہ نے ممتا بنرجی پر الزام عائد کیا کہ ’وہ اقتدار پر دوبارہ قابض ہونے کےلیے تشدد پر بھروسہ کر رہی ہیں‘۔ انہوں نے گذشتہ روز الیکشن کمیشن سے اپیل کی کہ ’ریاست میں سیاسی تشدد و دہشت گردی کا ماحول ہے ایسے میں فوری طور پر مرکزی فورسس کو تعینات کیا جانا چاہئے‘۔
