کورونا کا اثر اب مغربی بنگال ریاستی اسمبلی کے مانسون اجلاس پر بھی پڑتا نظر آرہا ہے۔ معاشرتی دوری کو قائم رکھنے کے لئے اسمبلی کا مانسون اجلاس ڈیجیٹل کیا جا سکتا ہے۔ اگرچہ ابھی اس سلسلے میں حتمی فیصلہ نہیں کیا گیا ہے۔ لیکن ذرائع کے مطابق اس فیصلے پر وزیر اعلی ممتا بنرجی کے ساتھ تبادلہ خیال کرنے کے بعد ہی آخری فیصلہ لیا جائے گا۔
اگر ایسا ہوتا ہے تو ریاستی اسمبلی کے تمام ارکان گھر سے اس اجلاس میں شامل ہو سکتے ہیں۔ اس کے لئے 294 ارکان کو جو ٹیب دیا گیا ہے اسی کے ذریعے یہ اجلاس ہوگا۔ اسپیکر بمان بنرجی اپنے گھر سے اجلاس کی صدارت کریں گے۔
اسمبلی ذرائع کے مطابق متعدد بل ابھی بھی رکے ہوئے ہیں۔ عوامی نمائندوں کے کئی کام رُکے ہوئے ہیں۔ ان ہی باتوں کو مد نظر رکھتے ہوئے ڈیجیٹل طور پر مانسون اجلاس منعقد کرنے کا فیصلہ کیا گیا ہے۔
اس سلسلے میں اپوزیشن کی طرف سے اعتراض بھی جتایا گیا ہے۔ ان کا کہنا ہے کہ وہ اپنے متعلقہ حلقوں سے آن لائن کیسے اجلاس میں شامل ہوں گے۔ اسی وجہ سے ابھی اس معاملے پر بحث جاری ہے۔
وزیراعلی ممتا بنرجی کے ساتھ تبادلہ خیال کرنے کے بعد ہی حتمی فیصلہ لیا جائے گا۔
واضح رہے اس سلسلے میں گورنر کا بھی رول اہم ہے۔ اسمبلی کے متعدد ارکان کا خیال ہے کہ گورنر کی اجازت کے بغیر ڈیجیٹل اجلاس کرنا ممکن نہیں ہے۔ اگر سب کچھ درست رہا تو جولائی کے مہینے میں مانسون اجلاس منعقد کیا جا سکتا ہے۔