اسمبلی انتخابات کے تحت آٹھویں اور آخری مرحلے کی پولنگ میں 4 اضلاع کی 36 سیٹوں پر جمعرات کو سخت سکیورٹی کے درمیان ووٹ ڈالے جائیں گے۔ ووٹنگ کے آغاز سے صرف 12 گھنٹے قبل انو براتا منڈل کو ایک بار پھر الیکشن کمیشن کی جانب سے ضابطۂ اخلاق کی خلاف ورزی کرنے کے الزام میں نوٹس بھیجا گیا۔
الیکشن کمیشن نے ترنمول کانگریس کے رہنما کو 72 گھنٹوں کے لیے گھر پر نظر بند رہنے کی ہدایت دی تھی جبکہ انوبراتا منڈل سکیورٹی اہلکاروں کو چکمہ دے کر گھر سے باہر چلے گئے جس کی اطلاع الیکشن کمیشن کو موصول ہونے کے بعد کمیشن کی جانب سے انہیں تلاش کیا گیا۔ تقریباً ڈھائی گھنٹوں کے بعد اطلاع ملی کہ انو براتا منڈل، تارا پیٹھ مندر میں ہیں اور وہ پوجا کے لیے وہاں گئے تھے۔
پولیس نے مندر پہنچ کر ترنمول کانگریس کے رہنما کو حراست میں لے لیا اور الیکشن کمیشن کا نوٹس ان کے حوالہ کیا گیا جس میں انہیں 30 اپریل تک گھر پر نظربند رہنے کی ہدایت دی گئی۔
واضح رہے کہ گزشتہ روز الیکشن کمیشن نے ترنمول کانگریس کے بے باک رہنما کو ’کھیلا ہوبے، کھیلا ہوبے اور فائن کھیلا‘ کا نعرہ دینے اور اپوزیشن پارٹی کو دھمکانے کے الزام میں گھر پر نظر بند کر دیا تھا۔
