اتراکھنڈ میں سردی عروج پر، عوام کو سخت مشکلات کا سامنا

اتراکھنڈ میں سردی کا موسم عروج پر پہنچ گیا ہے۔ برفباری کے باعث ہر طرف برف ہی برف نظر آرہی ہے۔ برفباری سے علاقے میں سردی کی شدت میں اضافے سے عوام کو سخت مشکلات کا سامنا ہے۔ اسی بیچ سیاحوں کی بڑی تعداد بھی علاقے میں پہنچ گئی۔

اتراکھنڈ کے پہاڑوں میں برفباری کے سبب ریاست کے دامن کے رہائشی علاقوں میں لوگوں کو سردی نے گھروں میں قید ہونے پر مجبور کر دیا ہے۔ اس کو دیکھ کر شہر کے تمام مرکزی مقامات پر علاقائی کانگریس قائدین نے الاؤ جلا کر لوگوں کو کچھ راحت دی ہے۔

آپ کو بتا دیں کہ ان دنوں اتراکھنڈ کے نشیبی علاقوں سمیت کاشی پور میں دھند اور سخت سردی کی لہر نے مقامی لوگوں کے ساتھ ساتھ مسافروں و سیاحوں کا جینا بھی مشکل بنا دیا ہے۔

اس سب کے باوجود میونسپل کارپوریشن نے ابھی تک علاقے کی کچی آبادیوں اور محلوں میں الاؤ جلانے کا کوئی انتظام نہیں کیا ہے۔

عوام کے مطالبے پر کانگریس پارٹی کے مقامی صدر سندیپ سہگل اور کانگریس کے رہنما راشد فاروقی، روشنی بیگم، بکلپ گڑیا نے شہر کے تمام مرکزی علاقوں میں الاؤ جلا کر سردی سے مقامی لوگوں اور مسافروں کو راحت بخشی۔

اس دوران پارٹی کے میٹرو پولیٹن صدر سندیپ سہگل نے کہا کہ ہمارا یہ قدم میونسپل کارپوریشن کی آنکھیں کھولنے کے لیے ہے تاکہ عام لوگوں کی ضروریات کو پورا کیا جاسکے۔