آج ہم آپ کو ایک ایسی دکان کے بارے میں بتانے جا رہے ہیں جس کو 'نیکی کی دکان' کے نام سے جانا جاتا ہے، اس دوکان کی خاص بات یہ ہے کہ یہاں ضرورت مندوں کی ضروریات کو پورا کرکے بدلے میں صرف نیکی کمائی جاتی ہے۔
اتراکھنڈ کے ضلع ادھم سنگھ نگر کے رودر پور میں واقع اس دکان کو نیکی کی دکان کہا جاتا ہے، اس دوکان سے بے سہارا، غربا اور مسکینوں کی ضروریات کو پورا کیا جاتا یے۔
گرچہ آپ نے اپنی زندگی میں مختلف قسم کی دکانیں دیکھے ہوں گے لیکن ضلع ادھم سنگھ نگر کے رودر پور کی آدرش کالونی میں رہنے والے دو بھائی بابو خان اور سونو خان گزشتہ تین برسوں سے 'نیکی کی دکان' چلا رہے ہیں۔
دونوں بھائیوں نے تین سال قبل علاقے کے بے بس لوگوں کو سردی سے بے حال دیکھا تو انہوں نے پہلے انہیں گھروں سے کپڑے دیئے اور پھر کچھ اور کرنے کا فیصلہ کیا تاکہ غریب لوگوں کو سہارا دیا جا سکے۔ اس دوران انہوں نے شہر میں ایک دکان کھولنے کا فیصلہ کیا اور اسکا نام 'نیکی کی دکان' رکھا۔
اس دکان سے غرباء، مساکین، بے سہارا اور مجبور لوگوں کو مفت میں کپڑا، کھانا اور تمام طرح کی سہولیات فرہم کی جاتی ہے اور اب اس دوکان سے سیکڑوں نہیں ہزاروں لوگ فائدہ اٹھا رہے ہیں جہاں مقامی لوگ بھی دونوں بھائی بابو خان اور سونو خان کی بھرپور مدد کر رہے ہیں۔
