مکان کی چھت منہدم، تین افراد کی موت

اترپردیش کے ضلع بدایوں کے اسلام نگر علاقے میں ایک سرکاری مکان کی چھت گرنے سے ریٹائرڈ ملازم ،اسکی بیوی اور بیٹے کی موت ہوگئی۔

سپرنٹنڈنٹ آف پولیس سدھارتھ ورما نے جمعرات کو یہاں بتایا کہ اسلام نگر علاقے میں خستہ حال سرکاری رہائش گاہ کی چھت گرنے سے اس میں رہ رہے ایک ہی کنبے کے تین افراد کی موت ہوگئی۔ مرنے والوں میں میاں۔بیوی اور ان کا بیٹا شامل ہیں۔

انہوں نے بتایا کہ قصبہ اسلام نگر میں محکمہ صحت کے قدیم سرکاری رہائش گاہ میں نرسنگ اسسٹنٹ سشیل اپنے کنبے کے ساتھ رہتا تھا۔ گذشتہ دنوں ہوئی تیز بارش میں آواس کی چھت گر گئی۔ مکان سے بدبو آنے پر آس پاس کے لوگوں نے پولیس کو اطلاع دی۔پولیس نے ملبہ ہٹایا تو اس کے نیچے سے سشیل(68)،بیوی نسیمہ(55)اور بیٹے سمیر(16)کی لاش برآمد ہوئی ہے۔پولیس نے تینوں کی لاشیں پوسٹ مارٹم کے لئے بھیج دی ہیں۔