اتر پردیش مدرسہ تعلیمی بورڈ کے امتحانات گزشتہ سال کی طرح اپنے طے وقت پر ہونا ممکن نہیں ہے، کیونکہ ابھی تک امتحان فارم کی تاریخ کا اعلان نہیں ہو پایا۔ اس کی سب سے بڑی وجہ یہ ہے کہ کورونا وبا کے چلتے سارے کاموں میں تاخیر ہوئی ہے۔
ای ٹی وی بھارت سے بات چیت کے دوران مدرسہ بورڈ کے رجسٹرار آر پی سنگھ نے بتایا کہ مدرسہ تعلیمی بورڈ کے امتحانات کب ہوں گے؟ ابھی یہ بتانا مشکل ہے۔
انہوں نے کہا کہ جنوری ماہ سے امتحانات فارم بھرنے کی تاریخ کا اعلان ہو جائے گا۔ امسال امتحانات فارم کافی دیر سے بھرے جائیں گے لہذا گزشتہ سال کی طرح طے شدہ وقت پر امتحانات ہونا مشکل نظر آ رہا ہے۔
اگر گذشتہ سال کے مدرسہ بورڈ امتحانات کی بات کریں تو 25 فروری سے شروع ہو گئے تھے اور مارچ میں مکمل ہو گئے تھے، لیکن امسال ایسا ہونا بہت مشکل ہے۔
قابل ذکر ہے کہ گذشتہ سال کی طرح اس بار بھی مدرسہ بورڈ نے طلباء کے بہتری کے لئے یو پی بورڈ کی طرز پر طلبا کو اچھے نمبر حاصل کرنے کا موقع فراہم کروا رہا ہے۔
اس میں جو طلبا جن مدارس میں زیر تعلیم ہیں، وہاں کے اساتذہ کو یہ اختیار ہو گا کہ وہ منشی مولوی میں 20 نمبر اور عالم میں 30 نمبر اس بنیاد پر دیں گے کہ "طالب علم کی پڑھائی کے دوران حاضری کتنے فیصد رہی؟ کیا اس کا دوسرے بچوں یا اساتذہ کے ساتھ بہتر سلوک رہا ہے؟ یا دیگر علوم میں کیسا رہا ہے؟"
اس بنیاد پر اتر پردیش مدرسہ بورڈ کے اساتذہ بھی طلبا کی صلاحیت کے اعتبار سے انہیں زیادہ سے زیادہ نمبر دے سکتے ہیں۔ اس سے طلباء کے نمبروں میں اضافہ ہوگا۔ مدرسہ بورڈ کی یہ تجویز مدارس طلبا کے لئے بہتر ثابت ہوئی تھی۔
مدرسہ تعلیمی بورڈ میں پہلے جہاں منشی مولوی میں 12 پرچے اور عالم کے امتحان میں 10 پرچے ہوتے تھے۔ انہیں کم کر کے منشی مولوی میں چھ پرچہ جبکہ عالم میں صرف پانچ پرچے کر دئیے گئے تھے، اس سال بھی ایسی پیٹرن پر امتحانات ہوں گے۔
معلوم رہے کہ گزشتہ سال یو پی مدرسہ تعلیمی بورڈ کے امتحانات میں کل 557 امتحان سینٹر بنائے گئے تھے، جن میں ایک لاکھ 82 ہزار 258 طلبا شامل تھے۔ امسال پہلے کے مقابلے کم امتحانات میں کم طلبا شامل ہوں گے کیونکہ کورونا وبا کے چلتے داخلہ دیر سے شروع ہوا اور آن لائن کلاسز چل رہی ہیں، جس کا اثر فارم بھرنے میں صاف نظر آئے گا۔
مزید پڑھیں:
'زرعی قوانین سے متعلق حکومت کو اپنی ضد چھوڑنی چاہئے'
اگر گزشتہ سال کی بات کریں تو یو پی بورڈ کے ساتھ مدرسہ بورڈ کے امتحانات شروع ہو گئے تھے، لیکن اس بار یو پی بورڈ کے امتحانات کے بعد ہی مدرسہ بورڈ کے امتحانات شروع ہوں گے۔
