لکھنؤ: اتر پردیش کے وزیر اعلی یوگی آدتیہ ناتھ اور ایودھیا کے رام مندر کو دھماکے سے اڑانے کی دھمکی دینے کے الزام میں دو افراد کو گرفتار کیا گیا ہے۔ ایک بیان کے مطابق اتر پردیش کی خصوصی ٹاسک فورس کی ایک ٹیم نے تہار سنگھ اور اوم پرکاش مشرا کو لکھنؤ کے گومتی نگر کے وبھوتی کھنڈ علاقے سے گرفتار کیا ہے۔
بیان میں کہا گیا ہے کہ دونوں نے نومبر میں ایکس پر ایک پوسٹ میں وزیراعلی یوگی آدتیہ ناتھ، ایس ٹی ایف کے سربراہ امیتابھ یش اور ایودھیا کے رام مندر کو بم سے اڑانے کی دھمکی دی تھی۔ اس میں کہا گیا کہ ابتدائی طور پر تحقیقات سے پتہ چلا ہے کہ 'عالم انصاری اور زبیر خان' نام سے دو جعلی ای میل آئی ڈیز کو دھمکی آمیز پوسٹس بھیجنے کے لیے استعمال کیا گیا تھا۔
مزید پڑھیں: یوگی کو بم سے اڑانے کی دھمکی دینے والا شخص ممبئی میں گرفتار
ای میل آئی ڈیز کے تکنیکی تجزیہ کے بعد پتہ چلا کہ تہار سنگھ نے ای میل اکاؤنٹس بنائے اور اوم پرکاش مشرا نے دھمکی آمیز پیغامات بھیجے۔ بیان میں کہا گیا ہے کہ سنگھ اور مشرا دونوں گونڈا کے رہائشی ہیں اور ایک پیرا میڈیکل انسٹی ٹیوٹ میں کام کرتے ہیں۔ اس نے مزید کہا کہ ایس ٹی ایف معاملے کی مزید تحقیقات کر رہی ہے۔
