ایک بلڈنگ کے تین دعویدار

سال1983 میں کانگریس پارٹی کے جنرل سیکرٹری و پارلیمان رکن راجیو گاندھی کے ہاتھوں اس عمارت کا افتتاح ہوا تھا۔ اب اس عمارت کے تین دعویدار ہیں، دیکھنا دلچسپ ہوگا کہ آخر میں اسکا کون مالک بن سکے گا؟

اتر پردیش کے دارالحکومت لکھنؤ میں یوتھ کانگریس کے دفتر میں مالکانہ حقوق حاصل کرنے کے لیے ایک نہیں، دو نہیں، بلکہ تین دعویدار موجود ہیں۔

آپ کو جان کر تعجب ہو رہا ہوگا، لیکن یہ بالکل حقیقت ہے، کیونکہ اس عمارت کی پہلی دعویدار یوتھ کانگریس پارٹی ہے، جب کہ دوسرا مالکانہ حق کا دعوی ایک بزنس مین کررہا ہے اور تیسری پارٹی ریاستی حکومت ہے۔ حکومت بھی اس دفتر کو اپنا بتانے کے لیے مسلسل کوشش کر رہی ہے۔

دفتر خالی کرانے کے لئے کانگریس پارٹی کو لگاتار نوٹس جاری کیا جا رہا۔ بزنس مین نے اس کے لئے عدالت کا دروازہ کھٹکھٹایا۔ لہذا کورٹ کی طرف سے یوتھ کانگریس کو نوٹس آرہے ہیں۔ساتھ ہی ریاستی حکومت کی طرف سے بھی کانگریس پارٹی کو آفس خالی کرانے کے لئے نوٹس آرہے ہیں۔ کانگریس بڑے پس وپیش میں ہےکہ آخر کیا کیا جائے؟واضح رہے کہ کانگریس پارٹی کے سابق وزیراعظم راجیو گاندھی نے اس بلڈنگ کا افتتاح کیا تھا۔ اب اسے خالی کرانے کے لیے مسلسل نوٹس آئے ہیں، جب کہ کانگریس کے اعلی افسران بتاتے ہیں کہ دو سال پہلے ہی ایک بزنس مین نے اس پر اپنا حق جتایا تھا۔کانگریس پارٹی کا کہنا ہے کہ ہمارے پاس اس سے جڑے ہوئے سارے کاغذات موجود ہیں۔ کانگریس کے اس دفتر کو خالی نہ کرنے پر بزنس مین نے کورٹ کا دروازہ کھٹکھٹایا، جس کے بعد سے ہی لگاتار نوٹس جاری ہو رہے ہیں۔کانگریس پارٹی کے سینیئر لیڈر اجے کمار للو نے بات چیت کے دوران بتایا کہ، "یوتھ کانگریس کے خلاف یوگی حکومت اپنے دباؤ میں نوٹس بھجوا رہی ہے، لیکن ہمارے پاس بلڈنگ کے سارے کاغذات موجود ہیں۔ ساتھ ہی الاٹمنٹ نمبر بھی ہے۔ ہم اس بلڈنگ کا لگاتار کرایہ بھی ادا کر رہے ہیں۔"