گلوکارہ کنیکا کپور کا بیان درج کرنے کی کاروائی شروع

اترپردیش کے دارالحکومت لکھنؤ میں ہندی فلموں کی گلوکارہ کنیکا کپور کے کورونا وائرس سے متاثر ہونے کی تصدیق کے بعد شہر میں میڈیکل ایمرجنسی جیسے حالات پیدا ہوگئے تھے۔

انکے خلاف لکھنؤ کے تین تھانوں میں ایف آئی آر درج کروائی گئی تھی۔ کئی دنوں تک کنیکا شہر کے پی جی آئی ہسپتال میں زیر علاج رہیں، اب انہیں ڈسچارج کر دیا گیا ہے۔

پولیس نے سی آر پی سی کی دفعہ 141 اور 160 کے تحت انہیں نوٹس جاری کیا، اب کنیکا کپور کو 30 اپریل کو اپنا بیان درج کروانا ہوگا۔

اس معاملے کی تحقیقات کر رہے آفیسر جے پی سنگھ نے کنیکا کپور کو انکے شالیمار گیلنٹ اپارٹمنٹ میں جاکر نوٹس دیا، جسے خود کنیکا کپور نے رسیو کیا۔

بتادیں کنیکا کپور پر سروجنی نگر تھانہ میں آئی پی سی 188، 269 اور 270 کے تحت ایف آئی آر درج ہے۔

ضرورت پڑنے پر کنیکا سے جڑے دیگر لوگوں سے پولیس پوچھ گچھ کرسکتی ہے۔

قابل ذکرہے کہ کنیکا کپور لکھنؤ میں کئی بڑی پارٹیوں میں شرکت کی، جس میں صوبے کے منسٹر سے لیکر اعلی افسران تک شامل رہیں۔ اسی کے بعد شہر کے تمام علاقوں کو سیل کر دیا گیا تھا۔