ایک دن میں کانپور ضلع جیل میں دس قیدی کورونا سے متاثر

آج کانپور ضلع جیل میں جب عارضی جیل سے منتقل کئے گئے قیدیوں کا کووڈ ٹیسٹ کیا گیا تو ان میں سے دس قیدیوں کی کورونا ٹیسٹ رپورٹ مثبت آئی جس کے بعد ضلع انتظامیہ نے ڈاکٹروں کی ٹیم کے ساتھ جیل کا معائنہ کیا۔

کانپور کے ضلع جیل میں اس وقت ستائیس سو قیدی ہیں۔ ان قیدیوں کو پہلے چوبے پور کے عارضی جیل میں رکھا جاتا ہے جہاں پندرہ دن کورنٹائن کر کے ان قیدیوں کی سبھی طرح کی جانچ کی جاتی ہیں جب جانچ رپورٹ منفی ہوتی ہے تو انہیں ضلع جیل میں منتقل کر دیا جاتا ہے۔

عارضی جیل سے منتقل کئے گئے قیدیوں کی ضلع جیل کے اسپتال میں جب جانچ کی گئی تو ان میں سے دس کی کورونا رپورٹ پازیٹیو آئی۔

جس کے بعد ضلع انتظامیہ میں افراتفری پھیل گئی۔

ضلع انتظامیہ نے فورا ڈاکٹروں کی دو ٹیم بنا کر کانپور ضلع جیل میں علاج کے لیے بھیجا۔ سبھی مثبت پائے گئے مریضوں کو ضلع جیل کے اندر بنے ایل ون وارڈ جو کووڈ 19 کے پروٹوکول کے مطابق ہے، اس میں منتقل کر دیا گیا جہاں سبھی قیدیوں کا علاج شروع کر دیا گیا ہے۔

وہیں ضلع جیل میں تمام طرح کے احتیاطی اقدامات بھی اٹھائے جارہے ہیں۔

کانپور ضلع میں اب تک تینتیس ہزار سے زائد کورونا پوزیٹو کے مریض پائے جا چکے ہیں جس میں اب تک 840 مریضوں کی موت ہوچکی ہے۔

اچانک دس مریضوں کی اطلاع ملنے سے کانپور ضلع میں ڈر کا ماحول پیدا ہوگیا ہے۔ ضلع انتظامیہ سے لے کر عوام تک احتیاطی اقدامات کرنے لگے۔