سلطانپور: پردھان کے شوہر کا قتل، بھائی کی حالت نازک

حادثے کے بعد مہاراج گنج ۔ مینارپور گاؤں میں حالات کشیدہ ہیں۔ مشتعل بھیڑ نے قتل کے ملزم کی گاڑی اور دکان وغیرہ میں آگ لگ دی ہے۔

اترپردیش کے ضلع سلطانپور کے کڑوار علاقے میں زمین پر قبضہ کے سلسلے میں بدمعاشوں نے پردھان کے شوہر کو گولی مار کر قتل کردیا جبکہ ان کا بھائی شدید طور سے زخمی ہوگیا۔
پولیس ذرائع نے بتایا کہ بدھ کی صبح گاؤں میں سرکاری زمین پر قبضہ کی مخالفت کرنے پر بدمعاشوں نے پردھان کے شوہر اور اس کے بھائی کو گولی مار دی۔ گولی لگنے سے معین الدین کی موقع پر ہی موت ہوگئی جبکہ بھائی نورالدین شدید طور سے زخمی ہوگیا۔ زخمی کو میڈیکل کالج لکھنؤ کے لئے ریفر کردیا گیا ہے۔
حادثے کے بعد مہاراج گنج ۔ مینارپور گاؤں میں حالات کشیدہ ہیں۔ انہوں نے بتایا کہ مشتعل بھیڑ نے قتل کے ملزم کی گاڑی اور دکان وغیرہ میں آگ لگ دی ہے۔ اطلاع ملنے پر سپرنٹنڈنٹ آف پولیس شیو ہری مینا خود فورس کے ساتھ موقع پر پہنچے۔ اور حالات کا جائزہ لیا۔ انہوں نے بتایا کہ بدمعاشوں اور معین الدین میں پرانی رنجش تھی۔ احتیاط کے طور پر گاؤں میں کئی تھانوں کی پولیس تعینات کی گئی ہے۔
اہل خانہ کی تحریر پر مقدمہ درج کرلیا گیا ہے۔ لاش کو پوسٹ مارٹم کے لئے بھیج دیا گیا ہے۔ مفرور ملزمین کی گرفتاری کے لئے پولیس دبش دے رہی ہے۔