حکومت فرقہ واریت کو فروغ دینے کا کام کر رہی ہے: عمیق جامعی

سماجوادی پارٹی کے قومی ترجمان عمیق جامعی نے مرکزی حکومت پر الزام لگاتے ہوئے کہا کہ 'مرکز میں جب سے بی جے پی نے اقتدار حاصل کیا ہے، ہر طبقہ اس کی عوام مخالف پالیسیوں سے پریشان ہے۔

سماجوادی پارٹی کے قومی ترجمان عمیق جامعی نے اپنے سیاسی دورے دوران کہا کہ اتر پردیش کے سیاسی حالات اب اس سمت میں گامزن ہیں، جہاں لوگوں کو سہولیات فراہم کرانے کے بجائے تقسیم کرنے کا کام کیا جا رہا ہے۔ ذات اور مذہب کے نام پر لوگوں کو آپس میں لڑانے کا کام کیا جا رہا ہے۔ مزید یہ کہ سرمایہ داروں کی حمایت میں پالیسی تیار کی جا رہی ہیں۔ اب حکومت کے نشانے پر سب سے زیادہ کاشتکار ہیں، جنہیں احتجاج کی وجہ سے گاڑی سے کچلنے کا کام کا جا رہا ہے۔

سماجوادی پارٹی کے قومی ترجمان نے مرکزی حکومت پر الزام لگاتے ہوئے کہا کہ مرکز میں جب سے بی جے پی نے اقتدار حاصل کیا ہے، ہر طبقہ اِن کی عوام مخالف پالیسی سے پریشان ہے۔ نوجوان بے روزگاری سے عاجز آ چکے ہیں، خواتین اپنے تحفظ کے لیے جدوجہد کر رہی ہیں، کاشتکار کو گزشتہ سات برسوں سے اپنی فصلوں کی واجب قیمت نہیں مل رہی ہے۔

انہوں نے بی جے پی حکومت پر شدید نکتہ چینی کرتے ہوئے کہا کہ اگر کاشتکار اپنے حق کی آواز بلند کر رہے ہیں تو اُن کی آواز دبانے کے لیے اُنہیں گاڑی سے کچلنے کا کام کیا جا رہا ہے۔ حکومت نے گذشتہ سات برسوں میں ”سوامی ناتھ کمیشن“ کی سفارشوں پر عمل نہیں کیا، جن کے مطابق کاشتکاروں کو واجب قیمت ادا کی جانی چاہیے۔

عمیق جامعی نے کہاکہ آج مہنگائی نے عام آدمی کی زندگی مشکل کر دی ہے۔ مہلک وبا کورونا نے لوگوں کے سامنے روزی روٹی کمانے کے لیے مشکل سوال کھڑے کر دیے ہیں۔ حکومت ان تمام ضرورت مندوں، غریبوں، بےروزگاروں اور کاشتکاروں کو سہولیت فراہم کرانے کے بجائے مہنگائی کی دوہری مار سے برباد کرنے پر آمادہ ہے۔ انہوں نے مزید کہاکہ کووڈ میں ہزاروں نوجوانوں کے ہاتھ سے روزگار ختم ہو گیا، لیکن حکومت اس جانب متوجہ ہونے کے بجائے فرقہ واریت کو فروغ دینے کا کام کر رہی ہے۔'