الوداع پر رواں برس بھی بے رونق رہا بارہ بنکی کا سٹی بازار

اتر پردیش کے ضلع بارہ بنکی میں جمعہ کے روز لگنے والی سٹی بازار کو کووڈ-19 کی دوسری لہر میں انفیکشن کی توسیع کو روکنے کے مقصد سے منسوخ کر دیا گیا ہے۔ اس کی وجہ سے مسلسل دوسری دفعہ جمعتہ الوداع کے موقع پر ضلع کی سٹی بازار نہیں لگی۔ اس کی وجہ سے عید الفطر کے لیے خریداری کرنے والوں کو کافی پریشانیوں کا سامنا کرنا پڑا۔

واضح ہو کہ بارہ بنکی شہر میں دھنوکھر چوراہے کے بعد سے سٹی بازار تک تقریباً 2 کلومیٹر تک سٹی بازار دور قدیم سے ہر جمعہ کو لگتی آ رہی ہے۔

اس بازار میں ضرورت کا تمام سامان مناسب قیمتوں پر ملتا ہے۔ اس کی وجہ سے یہاں دور دراز سے لوگ خریداری کرنے آتے تھے۔

رمضان اور اس کے آخری جمعہ کو اس بازار کی اہمیت میں اور اضافہ ہو جاتا تھا۔ عیدالفطر سے قبل آخری بازار ہونے کی وجہ سے یہاں لوگ عید کی تیاری کرنے کے لیے امڈ پڑتے تھے اور یہاں تل رکھنے کی بھی جگہ نہیں ہوتی تھی، لیکن گذشتہ برس لاک ڈاؤن اور رواں برس کرفیو کی وجہ سے سٹی بازار لگانے کی اجازت نہیں دی گئی ہے۔

اس کی وجہ سے عید کی تیاریاں کر رہے لوگوں کو تو پریشانی ہوئی ہی ہے، یہاں آنے ولے تاجروں کو بھی کافی نقصان اٹھانا پڑا ہوگا۔