سہارنپور میں سمپورن سمادھان دیوس کے موقع پر 24 افراد نے اپنی فریادیں افسران کے سامنے رکھی جبکہ موقع پر کسی بھی شکایت کو حل نہیں کیا جاسکا تاہم متعلقہ محکموں شکایتوں کا فوری حل تلاش کرنے کا حکم دیا گیا۔
تفصیلات کے مطابق جی ٹی روڈ پر واقع بلاک دفتر پر منعقدہ سمپورن سمادھان دیوس میں سابق رکن اسمبلی ششی بالا پنڈیر نے علاقے کے کچھ افراد کے ساتھ پہنچ کر ضلع مجسٹریٹ روبرو بعض مسائل اٹھائے۔
بی جے پی کے ایک رہنما نے ضلع مجسٹریٹ کو نگر پالیکا کی نئی حدبندی کرنے کا مشورہ دیا اور اس سلسلہ میں میمورنڈم حوالہ کیا۔ انہوں نے کہا کہ دیوبند سے جڑے باہری علاقوں کی کالونیاں کو نگر پالیکا علاقے میں شامل کرنے سے وہاں بھی بنیادی سہولتیں مہیا ہوں گی۔ بی جے پی دیوبند کے صدر وپن گرگ، جنرل سکریٹری ارون گپتا، ابھیشیک تیاگی، راجیش تنیجہ، وکاس تیاگی نے ڈی ایم کو میمورنڈم حوالہ کیا۔
سناتن دھرم سیوا ٹرسٹ کے صدر راکیش سنگھل کی قیادت میں ایک وفد نے ضلع مجسٹریٹ کو میمورنڈم سونپا جس میں محلہ پٹھانپورہ میں واقع پراچین مندر کی صفائی اور حدبندی کرانے کا مطالبہ کیا گیا۔ وفد میں ستیش گردھر، انوج اگروال، راجندر جوہری وغیرہ موجود رہے۔
اُدھر نگر پالیکا سے سبکدوش ہوچکے غلام صابر، نصیر اور اسلام الدین نے شکایت کرتے ہوئے کہا کہ ہائی کورٹ کے حکم کے ایک سال بعد بھی ان کے بقایہ جات ادا نہیں کئے گئے جو عدالتی حکم کی توہین کے مترادف ہے۔ اس موقع پر مختلف شعبوں سے متعلق 24 شکایتوں کو وصول کیا گیا۔ سی ڈی او پرتاپ سنگھ، ایس ڈی ایم راکیش کمار سنگھ، تحصیلدار ہرش چاؤلہ، سی او رجنیش اپادھیائے بھی پروگرام میں موجود تھے۔
