اتر پردیش کے ضلع بارہ بنکی میں جمعرات کو سماجوادی پارٹی نے یوم جمہوریہ کے موقع پر ٹریکٹر پریڈ کے دوران پولیس کے ذریعہ سماجوادی پارٹی کارکنان کے خلاف کی گئی کارروائی پر ضلع مجسٹریٹ سندیپ گپتا کو میمورنڈم دیا ہے۔ سماجوادی پارٹی کا الزام ہے کہ پولیس پر امن احتجاج کر رہے کارکنان پر ناجائز کاروائی کر ان کا استحصال کر رہی ہے۔ سماجوادی پارٹی کے کارکنان کے خلاف دائر مقدمہ کو واپس لینے اور انہیں فوراً رہا کرنے کا مطالبہ کیا ہے۔
دوپہر بعد سابق ریاستی وزیر فرید محفوظ قدوائی کی قیادت میں ایس پی کارکنان ضلع مجسٹریٹ دفتر پہنچے۔ یہاں انہوں نے نعرے بازی کے بعد ایڈشنل ضلع مجسٹریٹ سندیپ گپتا کو تین نکاتی میمورنڈم دیا۔ ریاست کے گورنر کو دئیے گئے اس میمورنڈم کے ذریعہ ایس پی کارکنان کا استحصال بند کرنے، ان پر دائر کئے گئے مقدمات کو واپس لینے اور گرفتار کارکنان کو رہا کرنے کا مطالبہ کیا گیا ہے۔
اس موقع پر سابق ریاستی وزیر فرید محفوظ قدوائی نے کہا کہ ہم اس قسم کی نہ انصافی برداشت نہیں کریں گے۔ انہوں نے کہا کہ ہم صرف کسانوں کی حمایت میں پر امن احتجاج کر رہے تھے، لیکن حکومت کی منشا ہے کہ کسان کو برباد کر دیا جائے۔ انہوں نے کہا کہ حکومت ایک ایک کر کے تمام چیزوں فروخت کر رہی ہے۔ اب کسانوں کی زمین سرمایہ کاروں کو فروخت کرنا چاہتی ہے، لیکن ہم ایسا ہونے نہیں دیں گے۔
واضح رہے کہ 26 جنوری کو قومی صدر اکھلیش یادو کی اپیل پر سماجوادی پارٹی کے کارکنان نے ٹریکٹر پریڈ نکالنے کی کوشش کی تھی۔ پولیس نے اس دوران انہیں روکنے کی کوشش کی تھی اور ضروری کاروائی بھی کی تھی۔
