سہارنپور: ملازمت سے برخاستگی پر عارضی ملازمین کا احتجاج

ملازمین کا کہنا تھا کہ کورونا کے دور میں جب مریضوں کے گھر والے بھی اپنوں ہاتھ لگانے سے ڈرتے تھے، ایسے میں انہوں نے جان ہتھیلی پررکھ کر لوگوں کی مدد کی لیکن آج انہیں ملازمت سے ہٹایا جا رہا ہے، یہ ناانصافی ہے۔

گورنمنٹ میڈیکل کالج سہارنپور میں تعینات مختلف عہدوں پر کام کرنے والے 226 ملازمین کو بغیر وجہ بتائے ہٹا دیا گیا۔ اس کے خلاف ملازمین نے میڈیکل کالج کے خلاف شدید احتجاج کیا اور ملازمت کی بحالی تک احتجاج جاری رکھنے کا اعلان کیا۔

گورنمنٹ میڈیکل کالج میں کورونا کی دوسری لہر کے باعث 6 ماہ قبل ضلع انتظامیہ نے 226 ملازمین کی عارضی آسامیوں پر تقرری کی تھی۔ گذشتہ روز صبح کالج انتظامیہ کی جانب سے تمام 226 ملازمین کو ان کے عہدوں سے ہٹانے کا نوٹس جاری کیا گیا۔

نوٹس جاری کرنے پر کام پر آئے ملازمین کے ہوش اڑ گئے۔ اس کے خلاف انہوں نے میڈیکل کالج کے گیٹ پر بیٹھ کر شدید احتجاج کیا۔

ملازمین کے ایک وفد نے کالج کے پرنسپل ڈاکٹر اروند ترویدی سے ملاقات کی جہاں انہوں نے تمام ملازمین کی بحالی کا مطالبہ کیا۔

ملازمین کے وفد کا کہنا تھا کہ کورونا کے دور میں جب مریضوں کے خاندان بھی اپنوں کو ہاتھ لگانے سے ڈرتے تھے، ایسے میں ہم نے جان ہتھیلی پر رکھ کر ان کی مدد کی لیکن آج انہیں ہٹایا جا رہا ہے، یہ ناانصافی ہے۔

ملازمین نے طویل مدتی احتجاج کا انتباہ دیتے ہوئے کہا کہ جب تک ان کی ملازمت بحال نہیں ہوگی اس وقت تک تحریک جاری رہے گی۔

کالج کے پرنسپل اروند کمار نے کہا کہ کووڈ کی دوسری لہر کے سبب ضلع انتظامیہ کی جانب 226 ملازمین کی عارضی طور پر تقرری کی گئی تھی، حالات معمول پر آنے کے بعد انہیں ہٹا دیا گیا ہے۔