اترپردیش حکومت کی جانب سے سہارنپور میں لیباریٹری وین کے ذریعہ غذائی اشیا کی جانچ کی جارہی ہے تاکہ ملاوٹ کا پتہ چلاکر ملاوٹی اشیا فروخت کرنے والوں کے خلاف سخت کاروائی کی جاسکے۔
ملاوٹ کے خلاف حکومت کی اس مہم کا آغاز 27 فروی کو ہوا تھا تاہم 5 مارچ تک یہ مہم سہارنپور کے دیوبند، سرساوہ، نکوڑ، گنگوہ، مرزا پور، بیہٹ، بہاری گڑھ، چھٹمل پور میں جاری رہے گی۔
ضلع بھر میں جاری اس مہم کے دوران غذائی اشیا کی جانچ اور ملاوٹ خوروں کے خلاف قانونی کارروائی کی جائے گی۔ ضلع مجسٹریٹ کی ہدایت پر محکمہ غذا کی جانب سے دفعہ 206 کے تحت بازاروں، منڈیوں اور دیگر مقامات پر لیباریٹری وین کے ذریعہ شعور بیداری مہم بھی چلائی جائے گی۔
سندیپ کمار چورسیا نے بتایا کہ مرکزی اور ریاستی حکومت کی جانب سے فوڈ سیفٹی آن وہیلس کے نام سے فوڈ لیبارٹری وین کا آغاز کیا ہے۔ اترپردیش میں اس طرح کے 6 وین ہیں۔ اس سلسلہ میں حکومت کی جانب سے ایک ٹول فری نمبر 18001805533 جاری کیا گیا۔ اس نمبر پر صارفین اپنی شکایات درج کرا سکتے ہیں۔
انہوں نے بتایا کہ یہ ضلع سہارنپور میں مہم کے اختتام کے بعد وین کو مظفرنگر اور شاملی کے لیے روانہ کردیا جائے گا۔
