ریاست اترپردیش کے محکمہ حمل و نقل کی جانب سے ریاست گیر پیمانے پر 14 اکتوبر'2019 سے 20 اکتوبر 2019 کے درمیان 'روڈ سیفٹی ویک' منایا جارہا ہے۔
روڈ سیفٹی ویک کے پہلے روز انڈس ویلی اسکول سیکٹر 62 کے آڈیٹوریم میں ایک ورکشاپ کا انعقاد کیا گیا، ورکشاپ کا افتتاح ضلع مجسٹریٹ گوتم بدھ نگر بی این سنگھ نے کیا۔
ورکشاپ کے آغاز میں ضلع مجسٹریٹ کے ذریعہ روڈ سیفٹی کے بارے میں آگاہی کے مقصد سے محکمہ ٹرانسپورٹ کے ذریعہ تیار کردہ دو فلائرز کا اجرا کیا گیا، جس میں سڑک حادثات کے متاثرین کو سرکاری امداد کے بارے میں تفصیلی معلومات فراہم کی گئی ہیں۔
اس کے علاوہ ایک فلائرز میں سڑک کے نشانات اور ٹریفک کی علامتوں کے بارے میں بھی تفصیلی معلومات دی گئی ہے، جبکہ اس میں یہ بھی بتایا گیا کہ سڑک پر چلتے ہوئے کن اصولوں کی پاسداری کی جانی چاہیے اور کن عادات اور طرز عمل اور غلطیوں سے گریز کیا جانا چاہیے۔
اترپردیش موٹر گاڑیوں کے قواعد 1998 میں جامع ترمیم کے ذریعہ اسکول کی گاڑیوں کے سلسلے میں ریاستی حکومت نے 27 مئی سنہ 2019 کو اپنائی جانے والی نئی دفعات اور قواعد وسیع تر تشہیر اور آسانی سے دستیابی کے مقصد کے تحت کتابی شکل دے کر تقسیم کیا گیا۔
سپرنٹنڈنٹ آف پولیس (ایس پی) انیل جھا نے اپنے خطاب میں کہا کہ ایک بڑے جمبو بوئنگ طیارے میں مسافروں کی تعداد کے برابر روز سڑک حادثات میں لوگوں کی موت ہوتی ہیں۔
انہوں نے کہا کہ اس کو موثر طریقے سے روکنے کے لیے ہمیں پہلے خود کی اصلاح کرنی چاہئے۔
میڈیکل ڈیپارٹمنٹ نے اسکول کے طلبا کی مدد سے سڑک حادثے میں زخمی ہونے والے افراد کی ابتدائی طبی امداد پر تفصیلی تبادلہ خیال کیا۔
چیف فائر آفیسر ارون کمار سنگھ سڑکوں اور سیفٹی کے نقطہ نظر سے گاڑیوں میں فائر فائٹنگ کے آلات کے استعمال پر زور دیا۔
فلم کمپنی کی جانب سے سوتنتر کمار، انوج اور رجت نے روڈ سیفٹی سے متعلق تکنیکی معلومات پر خطاب کیا۔
محکمہ ٹرانسپورٹ کی جانب سے ہمیش تیواری نے تمام شرکا کا شکریہ ادا کیا اور اس بات پر زور دیا کہ تمام شہریوں کو ان کے عملی سلوک میں صبر اور تحمل رکھنے کی ضرورت ہے۔
انہوں نے سماجی و معاشی نقطہ نظر سے روڈ سیفٹی کے موضوع پر نظر ثانی کرنے کی ضرورت کا ذکر کرتے ہوئے کہا کہ معاشرے کا ایک بہت بڑا طبقہ ایسا ہے جس کے شعور کی سطح اتنی بلند نہیں کہ سڑک کی حفاظت کو ترجیح میں شامل کریں۔
انہوں نے کہا کہ اس طبقے کو تبدیلی کے ساتھ ساتھ بیدار رہنے کی بھی بہت ضرورت ہے۔
