غازی پور: ریاست اترپردیش کے ضلع غازی پور کے شہر کوتوالی تھانہ مہاراج گنج کے نزدیک ہفتہ کی صبح کار و ٹڑک میں زبردست ٹکر ہوگئی جس میں دو خواتین کی موت ہوگئی اور چار افراد شدید زخمی ہوگئے۔ پولیس کے مطابق آج صبح وارانسی ضلع کے چولاپور تھانہ کے گنیش پور باشندہ شریواستو کنبہ اپنی کار سے گورکھپور سے وارانسی کی طرف جارہے تھے۔ تبھی ان کی کار کی ٹرک سے ٹکر ہوگئی جس میں ایک خاتون کی موقع پر ہی موت ہوگئی جبکہ دوسری نے دوران علاج دم توڑ دیا۔ مہلوکین کی شناخت ششی بالا شریواستو اور نشٹھا شریواستو کےطور پر ہوئی ہے۔
حادثے میں چار لوگ زخمی ہوئے ہیں، زخمیوں میں ستیم (37)،دیکشا شریواستو(40)، اپرنا شریواستو(17) اور منو شریواستو13) شامل ہیں۔ پولیس نے لاش کو قبضے میں لے لیا ہے اور زخمیوں کو علاج کے لئے میڈیکل کالج غازی پور میں داخل کرایا گیا ہے۔ وہیں ایک روز قبل ضلع کے تھانہ نونہارہ کے تحت پاڑہ قاسم آباد روڈ پر سڑک حادثے میں اسسٹنٹ ٹیچر کی موت ہو گئی۔ یہ حادثہ موٹر سائیکل کا بس سے تصادم کے بعد پیش آیا۔ امت ورما اپنی 27 سالہ بیوی شالینی ورما کو موٹرسائیکل پر اپنے گھر کاٹھوا لے جا رہے تھے کہ بدورا پاور ہاؤس کے قریب اچانک بس موٹر سائیکل کی ڈگی سے ٹکرا گئی، جس سے میاں بیوی گر گئے۔ بیوی کو سر میں شدید چوٹ آئی، ہسپتال لے جاتے وقت راستے میں ہی وہ دم توڑ گئی۔
یہ بھی پڑھیں: Pratapgarh Accident پرتاپ گڑھ میں ٹینکر اور آٹو کی ٹکر، بارہ لوگوں کی موت
یو این آئی
