ریاست اترپردیش کے ضلع پریاگ راج کے گھورپور علاقے میں پولیس کے ساتھ پیش آئے ایک مڈھ بھیڑ میں پولیس نے 25 ہزار روپے کے ایک انعامی بدمعاش کو گرفتار کیا ہے، جبکہ اس کا ساتھی اندھیرے کا فائدہ اٹھا کر فرار ہونے میں کامیاب ہوگیا۔
پولیس ذرائع نے بتایا کہ شہر میں جرائم پیشہ افراد کے خلاف خصوصی مہم چلائی جارہی ہے، اسی ضمن میں اتوار کی دیر رات پولیس گھورپور علاقے میں چیکنگ کررہی تھی۔
اس درمیان پولیس نے موٹر سائیکل سوار دو افراد کو روکنے کی کوشش کی تو وہ فرار ہونے لگے، پولیس کے تعاقب کرنے پر موٹر سائیکل سواروں نے پولیس پر فائرنگ کردی۔
جوابی کاروائی کرتے ہوئے پولیس نے بھی فائرنگ کی، جس سے پیر میں گولی لگنے سے ایک شخص گرگیا، جسے پولیس نے گرفتار کرلیا جبکہ دوسرا فرار ہوگیا۔
واضح رہے کہ زخمی نے اپنا نام سنیل بھارتیہ بتایا ہے، پولیس نے علاج کے لیے اسے ہسپتال میں داخل کرایا ہے۔
یاد رہے کہ پولیس کو سنیل کی کئی معاملوں میں تلاش تھی، اس کے خلاف ڈکیتی سمیت کئی مقدمے درج ہیں، اور ساتھ ہی اس کی گرفتاری پر 25 ہزار روپے کے انعام کا اعلان کیا گیا تھا۔
