لکھنؤ: فلمی دنیا کے مشہور اداکار رضا مراد سے آج ای ٹی وی بھارت کے نمائندہ نے خصوصی گفتگو کی۔
اس دوران رضا مراد نے ویب سیریز میں بڑھ رہی عریانیت پر سوال اٹھاتے ہوئے کہا کہ 'فلموں میں صرف عریانیت ہی نہیں دکھائی جاسکتی بلکہ اس سے قبل کئی ایسی فلمیں سپرہٹ رہی ہیں جن میں سادگی تھی لیکن ان فلموں نے باکس آفس پر کافی اچھا بزنس کیا۔ فلم بینوں نے اسے سراہا بھی۔
انہوں نے کہا کہ 'میں جانتا ہوں کہ ویب سیریز پر سنسر بورڈ کی قینچی نہیں چلتی ہے، لیکن ہمیں اپنی حدود طے کرنی ہوگی۔ اگر ہم اپنی حدود میں رہ کر کام کریں گے تو یہ نہ صرف ہمارے لیے بلکہ ملک اور معاشرے کے لئے بھی بہتر ہوگا'۔
رضا مراد نے کہا کہ 'اگر ہم اپنی سرحد عبور کرتے رہے تو حکومت کو مجبوراً کاروائی کرنا پڑے گی۔' اس کے علاوہ راجہ مراد نے یوپی میں فلم سٹی بنانے پر وزیر اعلی یوگی آدتیہ ناتھ کا شکریہ ادا کیا'۔
واضح رہے کہ اداکار رضا مراد وزیراعظم مودی کی زندگی پر مبنی فلم ’انڈیا ان مائی وینس‘ فلم سے متعلق پروگرام میں شرکت کے لئے آج لکھنؤ کے ہوٹل تاج پہنچے تھے۔
