رمضان اور اس ماہ مقدس میں روزہ کی فضیلت اور عظمت پر قرآن پاک میں خصوصی روشنی ڈالی گئی ہے۔ قرآن مجید جو ساری دنیا کے لیے ہدایت بن کر آیا وہ قرآن مجید اسی ماہ رمضان کے مبارک مہینے میں نازل ہوا۔
مفتی مولانا عبدالمنان کلیمی نے ای ٹی وی بھارت اردو سے بات چیت کرتے ہوئے کہا کہ جو مسلمان بھائی اس مہینے میں روزہ رکھتے ہیں اللہ اس کو اتنا اجر و ثواب فرماتا ہے کہ وہ اللہ کے قریب ہو جاتا ہے۔
روزہ رکھنا معمولی بات نہیں ہے جب انسان کا روزہ نہیں ہوتا ہے تو وہ دو یا تین گھنٹے بھوکا نہیں رہ سکتا لیکن ماہ رمضان کے اس مقدس مہینے میں روزے دار تقریباً 16 گھنٹے تک محض اللہ کی رضا کے لیے بھوکا اور پیاسا رہ لیتا ہے۔
رمضان انسان کو صبر عطا کرتا ہے۔ رمضان کے مہینے میں ایک نیکی کے بدلے اللہ ستر نیکیاں عطا فرماتا ہے لہذا ہر انسان کو اللہ کی عبادت کرنی چاہئے اور روزہ رکھنا چاہیے۔
ماہ رمضان کا مقدس مہینہ مسلمانوں کے لیے رحمت اور نعمت بن کر آتا ہے۔ ماہ رمضان کے اس مقدس مہینے میں مسجدوں میں عبادت گزاروں کی تعداد بڑھ جاتی ہےاور اللہ کے نزدیک ہونے کا اس سے بہترین موقع اور کوئی نہیں ہوتا۔
رمضان ایک بہترین موقع ہے۔ روزے رکھو اور اللہ کی عبادت کرو۔
