بارہ بنکی: ایٹہ معاملے میں وکلا کا احتجاج

دو روز قبل ایٹہ میں ایک سرکاری وکیل کے ساتھ پولیس کی جانب سے کی جارہی بدسلوکی کا ویڈیو وائرل ہوا تھا۔ ویڈیو میں صاف نظر آرہا تھا کہ کچھ پولیس اہلکار وکیل کے گھر کا دروازہ توڑتے ہیں۔ اور وکیل کو لاٹھی ڈنڈوں سے پیٹتے ہوئے لے جارہے تھے۔

ریاست اترپردیش کے ایٹہ میں پولیس کی جانب سے وکیل کے ساتھ بدسلوکی کرنے کے معاملے میں آج ضلع بارہ بنکی کے وکلا نے کثیر تعداد میں جمع ہوکر ضلع مجسٹریٹ دفتر کے سامنے احتجاج کیا۔

اس دوران وکلاء نے پولیس کے خلاف شدید نعرے بازی کی اور اے ڈی ایم سندیپ کمار گپتا کو ایک میمورنڈم دیکر پولیس اہلکاروں کے خلاف کارروائی کرنے کا مطالبہ کیا۔


اطلاعات کے مطابق دو روز قبل ایٹہ میں ایک سرکاری وکیل کے ساتھ پولیس کی جانب سے کی جارہی بدسلوکی کا ویڈیو وائرل ہوا تھا۔ ویڈیو میں صاف نظر آرہا تھا کہ کچھ پولیس اہلکار وکیل کے گھر کا دروازہ توڑتے ہیں۔ اور وکیل کو لاٹھی ڈنڈوں سے پیٹتے ہوئے لے جارہے تھے۔

وائرل ویڈیو پر نوٹس لیتے ہوئے بار کاؤنسل نے تمام اضلاع میں احتجاج کی اپیل کی تھی اس کے پیش نظر سنیچر کو کثیر تعداد میں وکلا نے احتجاج کیا اور ضلع مجسٹریٹ کو میمورنڈم پیش کیا۔

اس تعلق سے ضلع بار ایسوسی ایشن کے صدر جگت بہادر سنگھ نے کہا کہ جو سلوک پولیس نے ایٹہ کے وکلا کے ساتھ کیا ہے یہ سرمناک ہے، ایسا سلوک وکیل تو کیا اگر کسی عام آدمی کے ساتھ بھی پولیس کرتی ہے تو برداشت نہیں کیا جائے گا۔

انہوں نے کہا کہ اس وقت ونٹر ویکیشن کی وجہ سے کچہری بند ہے، نہیں تو اس معاملے کے خلاف زبردست احتجاج ہوتا۔