ریاست اتر پردیش کے ضلع میرٹھ کے عارضی جیل میں ایک قیدی نے پھانسی لگا کر اپنی جان دے دی۔ اس قیدی کو کنکرکھیڑا پولیس اسٹیشن نے 29 جون کو غیر قانونی شراب کے ساتھ گرفتار کیا تھا۔ قیدی کی خودکشی کے واقعے کے بعد تھانے میں افرا تفری کا ماحول پیدا ہو گیا۔ پولیس نے لاش کو پوسٹ مارٹم کے لیے بھیج دیا ہے۔
پولیس کے مطابق کنکرکھیڑا پولیس اسٹیشن نے 29 جون کو جیوری کے رہائشی کیلاش کو غیر قانونی شراب کے ساتھ گرفتار کیا تھا۔ گرفتاری کے بعد اسے ضروری کارروائی کے بعد سرچھوٹو رام انجینئرنگ کالج میں تعمیر عارضی جیل لایا گیا۔ یہاں 14 روزہ قرنطینہ مکمل کرنے کے بعد قیدی کو ڈسٹرکٹ جیل بھیج دیا گیا تھا۔
بتایا جا رہا کہ اتوار کی دیر شام وہ بیت الخلا گیا تھا۔ وہاں اس نے چادر کے ٹکڑے سے پھانسی کا پھندہ بناکر خودکشی کرلی۔ اس کا پتہ تب چلا جب دوسرا قیدی کچھ دیر بعد بیت الخلا گیا تو اس نے دروازہ بند ہونے پر آواز دی، لیکن کوئی جواب نہیں ملا۔ اس دوران مزید قیدی بھی وہاں آگئے اور پھر بیت الخلا کا دروازہ توڑا گیا تو کیلاش پھندے سے لٹکا ملا۔ عارضی جیل ڈاکٹر نے قیدی کا معائنہ کیا اور اسے مردہ قرار دے دیا۔
یہ بھی پڑھیں: بادل پھٹنے سے تین افراد ہلاک
سینئر جیل سپرنٹنڈنٹ بی ڈی پانڈے واقعے کی اطلاع ملتے ہی موقع پر پہنچ گئے۔ تھانہ سول لائن کو واقعے کی اطلاع دی گئی۔ تھانہ سول لائن پولیس نے لاش کو پوسٹمارٹم کے لئے بھیج دیا۔ وہیں سینئر جیل سپرنٹنڈنٹ بی ڈی پانڈے کا کہنا ہے کہ 'خودکشی کی وجہ کیا ہے اس کی تحقیقات کی جائیں گی۔ اس سلسلے میں اہل خانہ کو آگاہ کردیا گیا ہے۔
