ممتاز شاعر منور رانا کے گھر پولیس کی چھاپے ماری

ممتاز شاعر منور رانا کے گھر دیر رات پولیس نے چھاپے ماری کی۔ اس دوران منور رانا نے الزام عائد کیا کہ پولیس یہاں جبراً داخل ہوئی ہے اور بدتمیزی کر رہی ہے۔

ممتاز شاعر منور رانا کے بیٹے تبریز رانا پر کچھ روز پہلے ضلع رائے بریلی کے ایک پٹرول پمپ کے پاس کسی نامعلوم شخص نے گولی چلا دی تھی حالانکہ وہ گولی سے بچ گئے اور پوری طرح محفوظ ہیں۔

اسی معاملے کو لے کر رات تقریباً ایک بجے پولیس ٹیم منور رانا کے ڈینگرا اپارٹمنٹ میں بغیر اجازت داخل ہوئی اور جانچ پڑتال کرنے لگی۔

منور رانا کی بیٹی اور سماج وادی پارٹی کی قومی ترجمان سمیہ رانا نے اپنے بیان میں کہا کہ میرے بھائی تبریز رانا کے اوپر قاتلانہ حملہ ہوا لیکن پولیس ابھی تک حملہ کرنے والوں اور اس کے پیچھے کے لوگوں کو پکڑ نہیں پائی لیکن ہمارے یہاں آدھی رات میں جبراً داخل ہو کر پریشان اور بد تمیزی کر رہی ہے۔

قابل زکر ہے کہ معروف شاعر منور رانا کے بیٹے پر پٹرول پمپ کے قریب قاتلانہ حملہ ہوا تھا لیکن ابھی تک پولیس نے کسی کی گرفتاری نہیں کی۔ منور رانا کا کہنا ہے کہ میرے بیٹے پر حملہ قریبی لوگوں نے کرایا تھا کیونکہ وہ ہماری زمین پر قبضہ کرنا چاہتے ہیں۔