نوئیڈا:ریاست اترپردیش کی سیکٹر 11 پولیس نے راہگیروں سے زنجیر چھیننے والے لٹیرے کو گرفتار کیا ہے۔ اس کی نشاندہی پر سنار بھی پکڑا گیا جو چھینی ہوئی چین خریدتا تھا۔ پولیس گینگ میں شامل دیگر ملزمان کی تلاش کر رہی ہے۔ ڈی سی پی نوئیڈا ہریش چندر نے بتایا کہ ایک دن قبل سیکٹر 53 میں ایک خاتون سے چین چھیننے کا واقعہ پیش آیا۔ معاملے کی تحقیقات کے لیے پولیس کی تین ٹیمیں تشکیل دی گئی تھیں۔
انہوں نے کہا کہ ٹیم نے جائے وقوعہ کے ارد گرد نصب 100 سے زائد کیمروں کا جائزہ لیا۔ اس کے علاوہ شرپسندوں کا ریکارڈ چیک کیا گیا جس سے ایک ملزم کے بارے میں معلومات ملی۔ اس کے بعد پرویز عالم عرف سونو ساکن کالندی کنج دہلی کو گرفتار کر لیا گیا۔ اس سے پوچھ گچھ کے بعد منموئے (سنار ) قرول باغ، دہلی کو پکڑا گیا۔ ملزمان سے سونے کی چھ زنجیریں، ایک سونے کی بالی، 80 چمکتے ہوئے پتھر، 21,330 روپے، ایک غیر قانونی پستول، دو زندہ کارتوس اور ایک اسکوٹی برآمد ہوئی ہے۔
یہ بھی پڑھیں:UP Municipal Election بلدیاتی انتخابات سے قبل مظفرنگر میں پولیس نے اسلحہ اسمگلروں کو گرفتار کیا
ڈی سی پی نے بتایا کہ گینگ کا سرغنہ پرویز عالم ہے۔ وہ پچھلے تین سالوں سے دہلی-این سی آر میں بھیڑ والی جگہوں پر فون اور چین چھیننے کی وارداتیں انجام دیتا تھا۔ چھینی گئی چین کو فروخت کرنے کے لیے وہ کئی سناروں سے رابطے میں تھا۔ وہ زنجیر آدھی قیمت پر بیچتا تھا۔ نوئیڈا میں ملزم نے گزشتہ ایک ماہ میں چھ وارداتیں کی ہیں۔ پولیس کی تفتیش میں پتہ چلا ہے کہ ملزم پرویز صرف 10ویں پاس ہے۔ وہ 100 سے زائد وارداتوں کو انجام دے چکا ہے۔
