لکھنؤ: ریاست اترپردیش کے دارالحکومت لکھنؤ میں رام چرت مانس کی کاپیاں جلانے کے معاملے میں دو افراد کے خلاف نیشنل سکیورٹی ایکٹ (این ایس اے) کی کارروائی کی گئی ہے۔ اسسٹنٹ ڈپٹی کمشنر آف پولیس (اے ڈی سی پی) ایسٹ سید عباس کے مطابق، جیل میں بند پی جی آئی کے رہائشی سلیم اور سینک نگر کے رہائشی ستیندر کے خلاف این ایس اے کے تحت کارروائی کی گئی ہے۔ اے ڈی سی پی ایسٹ سید عباس کے مطابق 29 جنوری کو تھانہ پی جی آئی علاقے میں رام چرت مانس کی کاپیاں جلانے کے معاملے میں سوامی پرساد موریہ سمیت 10 لوگوں کے خلاف مقدمہ درج کیا گیا تھا۔ اس معاملے میں، ضلع مجسٹریٹ لکھنؤ کے ذریعے نیشنل سکیورٹی ایکٹ (این ایس اے) کی دفعہ 3 کی ذیلی دفعہ 2 کے تحت حراست میں لینے کا حکم اتوار کو ڈسٹرکٹ جیل لکھنؤ میں دیا گیا۔ رام چرت مانس پر سابق وزیر و سماجوادی پارٹی کے ایم ایل سی سوامی پرساد موریہ کے بیان کی حمایت میں آل انڈیا او بی سی مہا سبھا نے 29 جنوری کی صبح پی جی آئی پولیس اسٹیشن کے تحت ورنداون یوجنا تیراہے پر مظاہرہ کیا۔ اس دوران کارکنوں اور عہدیداروں نے رام چرت مانس کی کاپیاں جلاتے ہوئے نعرے بازی کی۔ مہاسبھا کے عہدیدار دیویندر یادو نے کہا تھا کہ شری رام چرت مانس کے شلوک میں ذاتوں کے بارے میں غلط باتیں لکھی گئی ہیں۔ انہوں نے کہا کہ ریاستی حکومت کی طرف سے شری رام چرت مانس میں لکھی گئی شلوک کو ہٹانے اور ان میں ترمیم کرنے کا بیان جاری کیا گیا تھا۔
اے ڈی سی پی ایسٹ سید عباس کے مطابق عیش باغ کے رہنے والے بھارتیہ جنتا پارٹی (بی جے پی) اقلیتی مورچہ کے ڈسٹرکٹ ورکنگ کمیٹی کے رکن ستنام سنگھ عرف لاوی کی تحریر پر مقدمہ درج کیا گیا تھا۔ ستنام نے الزام لگایا تھا کہ رام چرت مانس کی کاپیاں جلا کر ان لوگوں نے ایک کمیونٹی کے جذبات کو ٹھیس پہنچانے، فرقہ وارانہ فسادات، نفرت پھیلانے، لوگوں کو تشدد کے لیے اکسانے، امن و امان کو بگاڑنے کی کوشش کی۔ اس کے بعد فوری طور پر سینک نگر کے ستیندر کشواہا، عالم باغ کے یشپال سنگھ لودھی، ساؤتھ سٹی کے دیویندر پرتاپ یادو، بلدیو وہار تیلی باغ کے نریش سنگھ اور اتریتیا کے سلیم کو گرفتار کر لیا گیا۔ بتادیں کہ گزشتہ دنوں سماجوادی پارٹی کے رہنما سوامی پرساد موریہ نے رام چرت مانس پر پابندی عائد کرنے کا مطالبہ کیا تھا، انہوں نے رام چرت مانس سے متعلق متنازعہ بیان بھی دیا تھا جس کے بعد آل انڈیا او بی سی مہاسبھا نے 29 جنوری کو صبح پی جی آئی تھانے کے باہر احتجاج کیا تھا۔
یہ بھی پڑھیں : Jitin Prasad On Samajwadi Party رام چرت مانس کی توہین ایس پی کا انتخابی ہتھکنڈا، جتن پرساد
