ملک بھر میں کورونا کے مریضوں میں تیزی سے اضافہ ہو رہا ہے۔ قومی دارالحکومت دہلی سے متصل نوئیڈا میں بھی کورونا کی دوسری لہر کے سبب نئے کیسز میں زبردست اضافہ ہوا ہے۔ کورونا وائرس کی دوسری لہر کے دوران ملک کی تمام ریاستوں کے ہسپتالوں میں کہیں بیڈ کی کمی کے سبب مریضوں کو پریشانیوں کا سامنا کرنا پڑ رہا ہے تو کہیں آکسیجن کی کمی سے زیر علاج مریضوں کی موت میں اضافہ ہورہا ہے۔
بتایا جا رہا ہے کہ نوئیڈا میں بیڈز اور آکسیجن کی کمی ہے۔ مریضوں کو مشکلات کا سامنا کرنا پڑ رہا ہے۔ ایسے میں مقامی بی جے پی کے رکن پارلیمنٹ مہیش شرما کا کہنا ہے کہ آپ بیڈ، آکسیجن، وینٹی لیٹر اور انجکشن کے پیچھے نہ دوڑیں بلکہ ہوم آئسولیشن میں اپنا علاج کریں۔
شدید تنقید اور نکتہ چینی کے بعد نوئیڈا کے رکن پارلیمنٹ اور سابق مرکزی وزیر ڈاکٹر مہیش شرما نے ایک ویڈیو پیغام جاری کیا ہے۔ یہاں بھی انہوں نے اپنا منطق پیش کر تے ہوئے کہا کہ ہوم آئسولیشن میں اپنا علاج کریں۔ غیر ضروری طور سے ہسپتال میں بیڈ، آکسیجن، وینٹی لیٹر، ریمڈے سیویر انجیکشن کے پیچھے نہ بھاگیں۔ آکسیجن کہاں، کب، کس کو کتنی ضرورت ہے یہ آپ طے نہیں کر سکتے۔ یہ ڈاکٹروں پر چھوڑ دیں۔ سرکار کام کر رہی ہے جلدی حالات معمول پر آجائیں گے۔
