اترپردیش کے ضلع مئو کی صدر سیٹ سے رکن اسمبلی مختار انصاری کی رکنیت اسمبلی پر خطرہ پیدا ہو گیا ہے کیونکہ وارانسی کے سدھیر سنگھ نے اسمبلی اسپیکر ہردیہ نارائن دکشت کو رکنیت معطل کرنے کی درخواست دی ہے۔
سدھیر سنگھ کا کہنا ہے کہ مختار انصاری گزشتہ دس برس سے جیل میں بند پڑے ہیں، جس کی وجہ سے وہ اسمبلی کے کسی بھی سیشن میں حاضر نہیں ہوئے جبکہ بھارتی آئین کے مطابق 60 دنوں تک سیشن میں حاضر نہ ہونے پر رکنیت معطل کی جا سکتی ہے۔
معلوم رہے کہ رکن اسمبلی مختار انصاری روپڑ جیل میں بند ہیں۔ ان پر کئی بڑے سنگین الزامات عائد ہیں۔ ایسے میں مختار انصاری کی رکنیت اسمبلی پر خطرہ پیدا ہو سکتا ہے۔
سدھیر سنگھ نے اسمبلی اسپیکر سے درخواست کی ہے کہ مختار انصاری کی رکنیت اسمبلی معطل کر کے مئو کی صدر سیٹ خالی کروائی جائے۔
قابل ذکر ہے کہ مختار انصاری پر یوگی حکومت نے سخت کارروائی کرتے ہوئے ان کی اہلیہ افشاں انصاری اور ان کے دو بھائیوں سمیت پانچ افراد کے خلاف غیر قانونی قبضہ کے پیش نظر کارروائی کرتے ہوئے غیر ضمانتی وارنٹ جاری کیا تھا۔
