اترپردیش کے ضلع مرادآباد میں یوپی ورکنگ جنرلسٹ یونین کے عہدے داروں اور ممبروں نے مرادآباد کمشنر انجنی کمار سنگھ کو ایک میمورنڈم دے کر پرتاپ گڑھ کے رہنے والے ایک ٹی وی چینل کے صحافی کے قتل معاملے کی سی بی آئی جانچ کا مطالبہ کیا ہے اور کہا کہ حکومت کی جانب سے صحافی کے اہل خانہ کو 50 لاکھ روپے کی مالی مدد دی جائے۔
پرتاب گڑھ ضلع کے صحافی کے قتل معاملے میں آج مرادآباد کے یوپی ورکنگ جرنلسٹ یونین کے صحافیوں نے مرادآباد کمشنر سے ملاقات کی ۔
یونین کے سیکرٹری ریتیش دویدی نے میڈیا سے بات چیت کرتے ہوئے کہا کہ جس طرح سے پرتاپ گڑھ میں ایک ٹی وی چینل کے صحافی سلبھ شریواستو کا قتل ہوا ہے ۔اس قتل کو پولیس نے چار گھنٹے میں ہی ایک سڑک حادثہ بتا دیا۔ جبکہ مارے گئے شلبھ شریواستو نے کمشنر کو ایک درخواست دے کر کہا تھا کہ انہیں جان سے مارنے کی دھمکیاں مل رہی ہیں اس لیے انہیں سیکورٹی دی جائے۔
انہوں نےالزام عائد کرتے ہوئے کہا کہ شراب کاروباریوں نے صحافی سلبھ شریواستو کا قتل کیا ہے۔لہذا اس معاملے کی سی بی آئی جانچ ہونی چاہیے اور صحافی کے گھر والوں کو 50 لاکھ روپے کی مدد اور ایک سرکاری نوکری دیے جانے کا اعلان کیا جانا چاہئے۔
کمیشنر کو میمورنڈم دینے کے بعد سبھی صحافیوں نے ایک ساتھ کھڑے ہو کر دو منٹ کی خاموشی اختیار کرتے ہوئے صحافی کو خراج عقیدت پیش کی۔
