کھیلوں کے سامان کے لیے دنیا بھر میں مشہور میرٹھ اسپورٹس سامان کے ایکسپورٹ میں گزشتہ ایک ماہ میں 30 سے 60 فیصد کی کمی درج کی گئی ہے اور کورونا وائرس کے بڑھتے خطرے کے پیش نظر ایکسپورٹ میں مزید گراوٹ کا خطرہ ظاہر کیا جا رہا ہے۔
مغربی اتر پردیش کا ضلع میرٹھ اسپورٹس انڈسٹری کا ایک بڑا مرکز ہے، کھیلوں میں استعمال ہونے والے تقریباً تمام طرح کے سامان یہاں تیار کیے جاتے ہیں، کرکٹ بیٹ میں بی ڈی ایم، ایس ایف، ایس جی اور ایس ایس جیسے برانڈز نے جہاں عالمی سطح پر خاص مقبولیت حاصل کی ہے وہیں ٹینس، بیڈمنٹن اور اتھلیٹکس کے سامان بھی بڑے پیمانے پر تیار کئے جاتے ہیں۔
تین نسلوں سے اسپورٹس صنعت سے منسلک میرٹھ سے تعلق رکھنے والے روی شرما کا کہنا ہے کہ 'اقتصادی مندی کے دور میں میرٹھ کی اسپورٹس صنعت اتنا متاثر نہیں ہوئی جتنا کورونا وائرس کے بعد بند ہوئے ایکسپورٹ سے ہو رہی ہے۔
دنیا بھر میں کھیل کا سامان ایکسپورٹ کرنے والی میرٹھ کی اسپورٹس انڈسٹری میں کام بند تو نہیں ہوا ہے اور نہ ہی کارخانے بند ہوئے ہیں لیکن بر آمدات میں کمی سے مارکیٹ میں مندی ہے۔
اس سے قبل ایکسپورٹ کے علاوہ ریٹیل میں بھی کھیل کا سامان خریدنے والوں کی کمی نہیں رہتی تھی لیکن اب لوکل مارکیٹ میں بھی سامان کم سپلائی ہو رہا ہے۔
اسپورٹس صنعت سے وابستہ کاروباری مانتے ہیں کہ کورونا کے عالمی خطرے کو دیکھتے ہوئے سرکار کا احتیاطی قدم اٹھایا جانا ضروری ہے لیکن حالات جلد بہتر نہ ہونے کی صورت میں کاروبار پر مزید اثر پڑنا لازمی ہے۔
کورونا وائرس کے خطرے سے خوفزدہ دنیا کے ممالک ابھی اس خطرے سے نمٹنے کی تدابیر کر رہے ہیں لیکن اگر حالات جلد معمول پر نہیں لوٹے تو کاروبار پر اس کا اثر پڑنا لازمی ہے۔
