اترپردیش کے ضلع مئو میں خواتین لڑکیوں کی شادی کی عمر میں اضافے کی تجویز کو سراہا ہے۔ خواتین کے مطابق اس قدم سے ایک خاتون کو تعلیمی میدان میں بہتر کارکردگی کا موقع ملے گا۔
فی الحال ایک خاتون کی شادی کی کم از کم عمر 18 سال ہے۔ وزیر اعظم نریندر مودی اس میں تین سال کی توسیع کا ارادہ رکھتے ہیں۔ پارلیمنٹ کے آئندہ مانسون اجلاس میں یہ تجویز پیش کیے جانے کی امید ہے۔ اس پہل پر خواتین نے مثبت رائے پیش کی ہے۔
خواتین کے مطابق اس تجویز کے منظور ہو جانے سے خواتین کی تعلیمی شرح میں اضافہ ہونے کی پوری امید ہے۔ 21 سال کی عمر میں کوئی خاتون اپنی ازدواجی زندگی کے فیصلے بھی زیادہ بہتر انداز میں لے سکے گی۔
تعلیم یافتہ خواتین کا خیال ہے کہ دیہی علاقوں میں اس فیصلے کے دیر پا نتائج برآمد ہوں گے۔ شادی کی عمر میں اضافے کی تجویز سے خواتین کو اعلیٰ تعلیم سے آراستہ کیا جا سکتا ہے۔
ان کا ماننا ہے ک خواتین کو امور خانہ داری میں بھی بہتر فیصلہ لینے میں آسانی ہوگی۔ خواتین کے مطابق 18 سال کی عمر میں عام طور پر خواتین درجہ انٹرمیڈیٹ تک ہی پہنچ پاتی ہیں۔ شادی کی عمر 21 سال کئے جانے پر انہیں بہتر تعلیم کے ساتھ ساتھ خود کفیل ہونے کا بھی موقع ملے گا۔
