مرادآباد: محرم سے قبل زری بنانے کا سلسلہ جاری

ریاست اترپردیش کے مرادآباد میں واقع پیتل نگری عالمی سطح پر مشہور ہے۔ مرادآباد میں پیتل سے برتن بنانے کا کاروبار کیا جاتا ہے جبکہ یہ قیمتی اور قدیم کاروبار ہے۔ یہاں کے کاریگروں کی نقاشی و دستکاری کا ہنر قابل تعریف ہے۔

پیتل نگری میں جہاں ایک طرف پیتل سے برتن بنانے کا کاروبار کیا جاتا ہے تو وہیں عبادت گاہوں اور امام بارگاہوں میں رکھے جانے والی زریاں بھی یہیں پیتل سے بنائی جاتی ہیں۔ زری حضرت امام حسینؓ کے روضہ کی شبیہ کو کہا جاتا ہے۔

محرم کا چاند فلک پر نمودار ہونے سے قبل ہی مرادآباد میں زریاں بنانے کا سلسلہ شروع ہوجاتا ہے۔ پیتل کی زری پر لکھی گئی عبارات کو دیکھ کر آپ حیرت زدہ ہوجائیں گے جبکہ یہاں کاریگر اپنے ہاتھوں سے زری پر نقش و دستکاری کرتے ہیں جس میں مشین کا استعمال نہیں کیا جاتا۔