امروہہ میں مزدوروں کے ساتھ بڑا حادثہ

امروہہ ضلع کے گجرولا کوتوالی علاقے میں ہریانہ سے ضلع بدایوں اپنے گھروں کو واپس جا رہے مزدوروں سے بھری ڈی سی ایم ہائی ٹینشن لائن کی زد میں آنے سے حادثے کا شکار ہو گئی۔

ریاست اُتر پردیش کے ضلع امروہہ کے گجرولا پولیس اسٹیشن علاقے میں قومی شاہراہ 24 پر محمد آباد گاؤں کے قریب ہریانہ سے واپس آنے والے مزدوروں سے بھری ڈی سی ایم ہائی ٹینشن لائن کی زد میں آ گئ۔ جس کی وجہ سے نصف درجن سے زیادہ مزدورزخمی ہوگئے۔

پولیس اطلاع ملنے پر موقع پر پہنچ گئی اور علاج کے لئے سبھی زخمی مزدوروں کو ضلع ہسپتال میں داخل کرایا، جہاں دو کی حالت نازک بنی ہوئی ہے، انہیں ہائیر سنٹر میرٹھ ریفر کردیا گیا ہے۔

یہ سبھی مزدور اینٹ بھٹوں پر کام کرتے تھے لیکن اب لاک ڈاؤن کے دوران کام نہ ہونے کی وجہ سے تمام کارکن اپنے گھروں کو واپس جا رہے تھے۔

ضلع ہسپتال کے ایمرجنسی آفیسر ڈاکٹر اقبال احمد نے بتایا کہ ان میں سے دو کی حالت نازک ہونے کے بعد انہیں باہر لے جایا جارہا ہے جبکہ باقی مزدوروں کا علاج جاری ہے۔