اترپردیش کے شاہجہاں پور میں نیشنل ہائی وے 344 پر کچھ روز قبل ٹول پلازہ کا افتتاح عمل میں آیا جس کے بعد مقامی لوگوں نے جبراً ٹول ٹیکس وصول کرنے کی شکایت کی۔
سماج وادی پارٹی کے رہنما و ضلع پنچایت رکن سندیپ چودھری نے اس سلسلہ میں مقامی عوام کے ساتھ ٹول پلازہ انتظامیہ کے خلاف احتجاج کیا۔
انہوں نے مقامی افراد اور کسانوں سے ٹول ٹیکس وصول نہ کرنے کا ٹول انتظامیہ سے مطالبہ کیا لیکن ٹول پلازہ کے عہدیداروں نے مطالبہ قبول کرنے سے انکار کردیا جس کے بعد مقامی لوگ سخت ناراض ہوگئے اور سندیپ چودھری کی قیادت میں راستہ روکو احتجاج کیا۔
بعدازاں عہدیداروں کی جانب سے دیئے گئے تیقن کے بعد احتجاج کو ختم کردیا گیا۔ سندیپ چودھری نے بتایا کہ مقامی افراد سے ٹول ٹیکس وصول نہیں کیا جانا چاہئے۔ انھوں نے کہا کہ اس سلسلہ میں بہت جلد اعلیٰ حکام سے ملاقات کرکے عوام کو ہونے والی مشکلات سے واقف کروایا جائے گا۔
