ریاست اترپردیش کے شہر میرٹھ میں 12 نومبر سنہ 1844 کو تاریخ اردو ادب کے مایہ ناز، ممتاز شخصیت اور مفکر قوم اسماعیل میرٹھی کی پیدائش ہوئی۔
مولانا نے شروعاتی زندگی میں درس و تدریس کی خدمات انجام دینے کے بعد اپنی پوری زندگی قوم کے بچوں کی تعلیمی خدمات اور خاص طور پر تعلم نسواں کو فروغ دینے کے لیے وقف کردی۔
اسماعیل میرٹھی کے نام سے منسوب شہر میرٹھ میں موجود کئی مشہور تعلیمی ادارے آج بھی تعلیمی خدمات انجام دیتے ہوئے مولانا کے کارناموں اور سماجی خدمات کی مثال پیش کر رہے ہیں۔
میرٹھ شہر کی شناخت ایک تاریخی شہر سے زیادہ ان شخصیات سے منسوب ہے جن کی شہرت سے اس شہر کو ایک خاص شناخت ملی، انہیں میں ایک نام مولانا اسماعیل میرٹھی کا بھی نام ہے جن کی ولادت 12 نومبر 1844 کو میرٹھ میں ہوئی۔
اسماعیل میرٹھی کی فارسی اور عربی کی شروعاتی تعلیم گھر پر ہی ہوئی اس کے بعد 16 برس کی عمر میں انہوں نے رڑکی انجینئرنگ کالج سے ڈپلوما کیا، اور درس و تدریس سے وابستہ ہونے کے بعد مولانا نے شاعری کی شروعات نظم اور غزل سے کی۔ ایک شاعر کے ساتھ ساتھ مولانا مفکر کی حیثیت سے بھی اپنی خدمات انجام دیتے رہے اور سماج میں علم کی شمع روشن کرتے رہے۔
مولانا اسماعیل میرٹھی ہمہ جہت شخصیت کے مالک تھے، مولانا ایک مدرس تھے ایک شاعر بھی اور مفکّر قوم کا معمار بھی۔
مولانا قوم اور ملک کی ترقی، تعلیم کو اور سماجی قدروں کے لیے تربیت کو اہم سمجھتے تھے یہی وجہ تھی کہ مولانا نے اخلاقی قدروں کو فروغ دینے کے لیے نہ صرف بچوں کے لیے شاعری کی بلکہ اردو قاعدے کو بھی ترتیب دیا جو آج بھی مدرسہ نصاب کا جز ہے۔
