دنیا بھر سمیت بھارت میں بھی بچوں کا عالمی دن منایا گیا۔ اس موقع پر ریاست اترپردیش کے مرادآباد میں پولیس نے اسکولی بچوں کو پولیس کے کام کرنے کے طریقے سے متعلق انہیں روشناس کرایا۔
شہر کے صدر کوتوالی میں بچوں کے عالمی دن کے موقعے پر منعقد تقریب میں اسکولی طلبا کو بتایا گیا کہ پولیس عوام کے بیچ رہ کر کس طرح سے کام کرتی ہے۔
تقریب کے دوران سڑک سے گذر رہا سمیر نام کا ایک بچہ صدر کوتوالی کے احاطہ میں منعقد تقریب میں شریک ہو گیا اور اسکولی بچوں کے ساتھ پولیس کے کام کرنے کے طور طریقے سیکھنے لگا۔
سمیر کی عمر آٹھ برس تھی اس نے میڈیا سے بتایا کہ اس نے یہاں پر آکر بہت کچھ سیکھا کہ پولیس ملک کے لیے کس طرح سے کام کرتی ہے۔
سمیر نے بتایا کہ وہ پڑھا لکھا تو نہیں ہے لیکن اگر اسے موقع ملا تو وہ تعلیم حاصل کرنے کا خواہاں ہے، سمیر بتاتا ہے کہ اس کے دو چھوٹے بھائی بہن ہیں اور والد ایک فورم میں کام کرتے ہیں، اس کے گھر کی معاشی حالت اچھی نہیں ہے، اسی لیے اس نے تعلیم حاصل نہیں کی، لیکن اگر اسے مستقبل میں پڑھنے کا موقع ملا تو وہ ضرور پڑھنا چاہے گا۔
