اترپردیش حکومت کورونا وبا کی تیسری لہر سے نمٹنے کے لئے مؤثر طریقے سے حکمت عملی پر عمل پیرا ہے۔ اس کے تحت، تمام ضلعی ہسپتالوں اور مقامی صحت مراکز میں تیسری لہر سے نمٹنے کے انتظامات کیے جارہے ہیں۔ خاص طور پر بچوں کو محفوظ رکھنے کے لئے پی آئی سی یو بیڈ تیار کیے جارہے ہیں۔ تاکہ کسی بھی تباہ کن صورت حال میں بچوں کو اس سے محفوظ رکھا جاسکے۔
اترپردیش کے ایڈیشنل چیف سکریٹری صحت امت موہن پرساد نے گوتم بودھ نگر کا دورہ کرتے ہوئے ہسپتالوں کا معائنہ کیا۔ انہوں نے ڈسٹرکٹ کووڈ ہسپتال میں تیار کردہ 30 بستروں والے پی آئی سی یو اور 50 بیڈ کے آئسولیشن وارڈ کا افتتاح کیا۔ ان کے ہمراہ سی ایم او ڈاکٹر دیپک اوہری اور سی ایم ایس رینو اگروال بھی تھے۔ دونوں نے ان کو تیاریوں کے بارے میں تفصیلی معلومات دیں۔ اس کے ساتھ ہی امت موہن پرساد نے پورے ہسپتال کا معائنہ کیا۔
آکسیجن پلانٹ کا بھی جائزہ لیا اور ہسپتال کے اقدامات پر اطمینان کا اظہار کیا۔ انہوں نے کہا کہ ریاستی حکومت تیسری لہر سے بچاؤ کے پیش نظر ہر ممکن کوشش کر رہی ہے۔
