انڈین انسٹی ٹیوٹ آف کارپٹ ٹکنالوجی کے ڈائریکٹرآلوک کمار نے ایک خاص قسم کی پی پی ای کٹ تیار کی ہے۔ یہ پی پی ای کٹ پہننے کے بعد صحت کارکن کورونا سے مکمل طور پر محفوظ ہوجائیں گے۔ جیسے ہی پی پی ای کٹ کے بیرونی حصے سےکورونا وائرس ٹکرائے گا فوراً وہ زمین پر گر جائے گا۔ اس کٹ کی خصوصی خصوصیت یہ ہے کہ اسے پانچ بار پہنا جاسکتا ہے۔
نئی پی پی ای کٹ کو اس انداز میں تیار کیا گیا ہے کہ پسینہ بھاپ بن کر اڑ جائے گا، جس سے صحت کارکنوں کو بہت آرام محسوس ہوگا۔
اس سلسلے میں انسٹی ٹیوٹ آف ٹکنالوجی کے ڈائریکٹر آلوک کمار نے بتایا کہ اب تک مارکیٹ میں جو پی پی ای کٹس دستیاب ہیں وہ بہت بھاری ہوتی ہیں۔ نیز جب انہیں پہنتے ہیں تو آپ کو سانس لینے میں دشواری محسوس ہوتی ہے۔ کافی تحقیق کے بعد تیار کیے گئی اس کٹ کا مائکروبیل ٹریٹمینٹ کیا گیا ہے۔ ایسا کرنے سے کوئی وائرس اس پر زندہ ٹک نہیں سکے گا، یعنی انفیکشن کا خطرہ نمایاں طور پر کم ہوجائے گا۔ یہ پی پی ای کٹ اینٹی مائکروبیل اور اینٹی بیکٹیریل ہے۔
کٹ میں ایسی خصوصیات لانے کے لیے اس کو پانی اور تیل سے مزاحم بنایا گیا ہے۔ اس کے ساتھ اس کٹ کو پانچ بار دھویا اور پہنا جاسکتا ہے۔ یہ کٹ وزارت صحت اور خاندانی بہبود کے معیار کو مدنظر رکھتے ہوئے تیار کی گئی ہے۔ اسے مارکیٹ میں لانے کے لئے حکومت کی طرف سے منظوری بھی موصول ہوگئی ہے۔ نیز یہ توقع کی جارہی ہے کہ جلد ہی اسے پانچ بار استعمال کرنے کی منظوری دی جائے گی جو تاحال موصول نہیں ہوئی۔
آلوک کمار نے بتایا کہ کانپور کی ایک کمپنی سے معاہدہ کیا جارہا ہے۔ کانپور کمپنی جلد ہی اس کٹ کو مارکیٹ میں لانچ کرے گی۔ اس کی قیمت مارکیٹ میں موجود پی پی ای کٹ سے کہیں کم ہوگی۔ اس کے ساتھ ابتدائی دنوں میں ان پی پی ای کٹس کو چار سائز میں تیار کرنے کا منصوبہ ہے۔
