اتر پردیش کے کابینی وزیر برائے اقلیتی بہبود اوقاف، حج نند گوپال گپتا 'نندی' نے اعلان کیا ہے کہ 18 دسمبر کو یوم اقلیتی حقوق وسیع پیمانے پر منایا جائے گا۔ اقلیتی طبقے کی فلاح و بہبود کے لئے یو پی حکومت متعدد اسکیموں کو تفصیل سے بتائے گی تاکہ اقلیتی سماج کے لوگ حکومت کی تمام اسکیموں کا فائدہ اٹھا سکیں۔
نند گوپال گپتا نندی نے جانکاری دیتے ہوئے بتایا کہ یوم اقلیت کے موقع پر محکمہ اقلیتی طبقہ کے لوگوں کو قرض، محکمہ کا آن لائن پورٹل اور چار باغ واقع مسلم مسافر خانہ کا موبائل ایپ کا افتتاح کیا جائے گا۔
قابل ذکر ہے کہ چار باغ واقع مسلم مسافر خانہ بدحالی کا شکار تھا۔ ای ٹی وی بھارت کے لگاتار خبر دکھائے جانے کے بعد ذمہ داران نے نوٹس لیا، جس کے بعد وہاں کام شروع ہو پایا۔ مسافر خانہ میں اب موبائل ایپ کے ذریعے بکنگ ہوا کرے گی تاکہ وہاں کے ملازمین من مانی نہ کر پائیں۔
کابینی وزیر نے بتایا کہ ریاستی حکومت نے اقلیتی طبقہ کی بہتری کے لیے نمایاں کام کیا اور آگے بھی کرتی رہے گی کیونکہ وزیر اعظم نریندر مودی کا کہنا ہے کہ "سب کا ساتھ، سب کا وکاس اور سب کا وشواس۔"
