مایاوتی نے پیر کو اپنے ٹوئٹ میں لکھا" مرکز اور سبھی ریاستی حکومتیں کورونا وائرس کی ٹیسٹنگ بڑھانے کے ساتھ ساتھ خاص کر بے سہارا ومجبور لاکھوں غریب مزدوروں کو پیٹ بھر کھانے دستیاب کرائیں ورنہ بھوک سے تڑپتے یہ لوگ کیسے اپنی قوت مدافعت بڑھا کر مہلک کورونا بیمار ی سے بچ سکیں گے۔سرکاری گوداموں میں رکھا غلہ آخر کس دن کام آئے گا"۔
انہوں نے کہاکہ "ویسے بہتر تویہ ہوگا کہ حکومتیں لاک ڈاؤن سے متاثر ان لاکھوں مظلوم و مجبور لوگوں کو جلد سے جلد مناسب انتظام کر کے انہیں ان کے گھروں تک محفوظ بھجوائے اور فوری طور پر ان کی کچھ مالی مدد بھی ضروری کریں"۔
قابل ذکر ہے کہ اترپردیش حکومت نے باہر کام کرنے والے اور وہیں پھنسے رہ گئے مہاجر مزدوروں کو مرحلہ وار طریقے سے واپس لانے کا فیصلہ کیا تھا۔ اڈیشنل چیف سکریٹری(داخلہ)اونیش اوستھی کے مطابق ہریانہ سے اب تک 2224 مہاجر مزدورں کو ریاست واپس لایا جاچکا ہے جبکہ تقریبا 10ہزار مزدوروں کے ہریانہ سے آنے کے امکانات ہیں۔
