رامپور سے رکن پارلیمان اعظم خاں ابھی علیل ہیں اور دوبارہ ان کی طبیعت ناساز ہونے پر ان کو آئی سی یو میں منتقل کیا گیا ہے۔ ان کی صحت یابی کے لئے سماج کے سبھی طبقے اور فرقوں سے تعلق رکھنے والے لوگ دعائیں کر رہے ہیں۔ دلت سماج سے تعلق رکھنے والے اعظم خاں کے حامی وکی راج ایڈووکیٹ نے رمضان المبارک میں جمعۃ الوداع کا روزہ رکھ کر اعظم خاں کی صحت یابی اور رہائی کے لئے دعا کی۔ نمائندہ ای ٹی وی بھارت نے ان سے خصوصی بات کی ہے۔
ای ٹی وی بھارت سے بات کرتے ہوئے وکی راج نے کہا کہ ہمارے ملک میں بابا رام رحیم جیسے جرائم پیشہ افراد کی سزا کو کم کیا جا رہا ہے جب کہ ملک کے نوجوانوں کے لئے تعلیمی ادارے قائم کرنے والے، تعمیر و ترقی کے مظہر رکن پارلیمان محمد اعظم خاں کو سخت علیل ہونے پر بھی پیرول نہیں دی جا رہی ہے۔ انہوں نے کہا کہ اعظم خاں جیسے لیڈران ہزاروں برس میں پیدا ہوتے ہیں۔
