اترپردیش کے شہر سہارنپور میں چوری کے واقعات میں اضافہ ہوگیا ہے۔ جس کے سبب مقامی پولیس چاک وچوبند ہوگئی ہے۔ اور اب موصولہ اطلاع کے مطابق ایس ایس پی سہارنپور کے ذریعہ گاڑی چوروں کے خلاف گرفتاری کی مہم شروع کی ہوئی ہے۔ اسی سلسلہ میں آج تھانہ گنگوہ پولیس کو بڑی کامیابی حاصل ہوئی، گنگوہ پولیس کے ذریعہ مخبر کی اطلاع پر تین موٹر سائیکل چوروں کو گرفتار کیا گیا ہے۔
پولیس کو مخبر کے ذریعہ اطلاع ملی تھی کہ کچھ نوجوان چوری کے واقعہ کو انجام دینے والے ہیں اور وہ گنگوہ تیترو روڈ پر کھڑے ہیں جس پر تھانہ گنگوہ پولیس نے فوراً کارروائی کرتے ہوئے موٹر سائیکل چوروں کو گھیر لیا، پولیس نے موقع سے شیو کمار ولد پالا رام، کلد یپ ولد عجب سنگھ، سوربھ ولد راکیش تھانہ گنگوہ کو چوری کی 6موٹر سائیکلوں کے ساتھ گرفتار کیا۔
پولیس نے ان کے قبضہ سے 6موٹر سائیکلیں غیر قانونی اسلحہ اور کارتوس بھی برآمد کئے گئے۔ تینوں چوروں کا جرائم ریکارڈ حاصل کیا جارہا ہے اور ساتھ ہی چوری کے ان واقعات میں شامل دیگر لوگوں کی تلاش بھی جاری ہے۔ پولیس نے تینوں چوروں کو مختلف دفعات میں مقدمہ قائم کرکے جیل بھیج دیا ہے۔
