یہ واقعہ ہادی حسن ہال میں 13 مئی کو پیش آیا تھا، شراب کی اس محفل کا ویڈیو جب یونیورسٹی انتظامیہ تک پہنچا تب ان طلبا پر علی گڑھ مسلم یونیورسٹی کے کیمپس اور کالجوں میں داخلے پر پابندی لگادی گئی ہے اور اس معاملے کی جانچ کے لیے ایک کمیٹی بھی تشکیل دی گئی ہے۔
ہادی حسن ہال میں رہنے والے رجت چودھری، سوریہ پرتاپ سنگھ، امیت کمار راجپوت، شریانش اور پریاس جندل کو اے ایم یو کے پراکٹر محسن خان نے معطل کردیا ہے۔
ان طلبا پر الزام ہے کہ گزشتہ 13 مئی کی رات میں ہاسٹل کے روم نمبر 476 میں شراب و نشیلی اشیا کا استعمال کیا تھا اور اس بات کی اطلاع کسی نے ویڈیو بناکر یونیورسٹی کے انتظامیہ کو دے دی۔
جب یونیورسٹی کے سیکیوریٹی عملے نے کمرے کی تلاشی لی تو کمرے سے شراب کی بھری اور خالی بوتل کے ساتھ ساتھ گانجا و نمکین بھی برآمد کیا۔
یونیورسٹی کے پی آر او کا کہنا ہے کہ کیمپس میں نشیلی اشیأ کا استعمال کرنے کی سخت ممانعت ہے اور اس یونیورسٹی ہاسٹل میں بھی اس کی اجازت نہیں ہے اور طلبا کے پاس یہ نشیلی اشیا پائے جانے کے بعد ہی ان کے خلاف یہ کارروائی کی گئی ہے۔
