عالمی وباء کووڈ 19 کے دور میں دیگر اداروں کی طرح رامپور میں واقع محمد علی جوہر یونیورسٹی کی بھی تمام سرگرمیاں آن لائن جاری ہیں۔
یونیورسٹی کی جانب سے بین الاقوامی سطح کا 7 روزہ فیکلٹی ڈیولپمنٹ پروگرام جاری ہے جس میں دنیا کے مختلف ممالک سے اس موضوع کے ماہرین و دانشواران ہر روز مرکزی موضوع کے تحت خطاب کرتے ہیں۔ آج کے اہم مقرر بنگلہ دیش کے حبیب الاسلام رہے، جو فی الوقت بھالوگاری لمیٹیڈ میں چیف ٹیکنیکل آفیسر ہیں۔
انہوں نے اپنا لیکچر سیلف ٹرانسفورمیشن اور پبلک اسپیکنگ کے موضوع پر دیا۔ پروگرام کا آغاز شعبۂ اقتصادیات کے ایچ او ڈی ڈاکٹر پلکت اگروال کے افتتاحی کلمات سے ہوا، جنہوں فیکلٹی ڈیولپمنٹ پروگرام کے اغراض و مقاصد پر روشنی ڈالی۔
یونیورسٹی کے وائس چانسلر سلطان محمد خان نے پبلک اسپیکنگ کے ذریعہ کیسے سیلف ٹرانسفورمیشن کیا جائے، اپنا نقطہ نظر بیان کیا۔ آج کے اہم مقرر ڈاکٹر حبیب الاسلام نے اپنے لیکچر میں پبلک اسپیکنگ کے ذریعہ سیلف ٹرانسفورمیشن پر اپنے خیالات کا اظہار کیا۔
انہوں نے کہا کہ کس طرح سے خطاب عام کے ذریعہ سے خود کی شخصیت کو آپ تبدیل کر سکتے ہیں۔ انہوں نے خطاب عام کے مختلف پہلوؤں پر بھی گفتگو کی۔
پروگرام کے آخر میں ڈاکٹر پلکت اگروال نے جوہر یونیورسٹی کے اس آن لائن پروگرام کو پوری ریاست کے ایک خاص قسم کے پروگرام سے تعبیر کیا۔ وہیں انہوں نے جوہر یونیورسٹی کے بانی اور چانسلر رکن پارلیمان اعظم خان کی کاوشوں کو بھی کافی سراہا۔
