'سو فیصدی جرائم روکنے کی گارنٹی بھگوان رام بھی نہیں دے پائیں گے'

یوگی حکومت میں وزیر مملکت محکمہ فوڈ اینڈ سپلائی رویندر سنگھ عرف دھنی سنگھ نے خواتین کے خلاف بڑھتے جرائم کے سوال پر متنازعہ بیان دیتے ہوئے کہا کہ 'سو فیصدی جرائم روکنے کی گارنٹی تو بھگوان رام بھی نہیں دے پائے تھے تو ہماری حکومت یہ گارنٹی کیسے دے سکتی ہے؟'

ریاست اُترپردیش کے ضلع بارہ بنکی میں صحافیوں سے گفتگو کے دوران جب رویندر سنگھ سے اناؤ میں جنسی زیادتی کے بعد خاتون کو جلانے کے کریہہ جرم کے تعلق سے سوال کیا گیا تو انہوں نے یہ ماننے سے انکار کر دیا کہ ریاست کا نظم و نسق درست نہیں ہے۔

انہوں نے کہا کہ 'پہلے کی حکومتوں میں ملزمین کو سہارا دیا جاتا تھا، لیکن یوگی حکومت ہی ایسی حکومت ہے جہاں ملزمین کو جیل بھیجا جا رہا ہے۔'

انہوں نے کہا کہ 'جب سماج ہے تو جرم ہونا لازمی ہے۔ سو فیصدی جرائم رکنے کی گارنٹی جب بھگوان رام نہیں دے پائے تو ہم کیسے دے سکتے ہیں؟'

انہوں نے مزید کہا کہ 'ہم جرم کا زیادہ سے زیادہ انکشاف کر کے ملزمین کو جیل بھیجنے کا کام کر سکتے ہیں اور وہ کر بھی رہے ہیں۔'