چلتی بس میں لگی آگ، ایک مسافر ہلاک

ریاست اترپردیش کے ضلع فیروز آباد میں آگرہ - لکھنؤ ایکسپریس وے پر ایک بڑا سانحہ پیش آیا ہے۔

بس بے قابو ہوکر ڈیوائیڈر سے جا ٹکرائی جس کے سبب ایک مسافر زندہ جل کر ہلاک ہوگیا اور ڈرائیور سمیت دیگر مسافر بھی شدید طور پر زخمی ہوئے ہیں جنہیں قریبی اسپتال میں داخل کرادیا گیا ہے۔

صبح تقریباً 5:15 بجے کو یہ حادثہ پیش آیا، یہ بس بہار سے گجرات جا رہی تھی اور بس میں 69 افراد سوار تھے۔

بس میں آگ لگتے ہی افراتفری کا ماحول پیدا ہوگیا۔ زیادہ تر مسافروں نے کود کر اپنی جان بچائی لیکن کرشی دیو نامی ایک شخص زندہ جل کر ہلاک ہوگیا۔

واقعہ کی اطلاع ملتے ہی ایس پی راجیش کمار اور فائر بریگیڈ کی گاڑیاں موقع پر پہنچیں جس کے بعد آگ پر قابو پایا جاسکا۔

ایس پی راجیش کمار نے مزید بتایا کہ جو مسافر محفوظ ہیں انہیں دیگر ذرائع سے ان کے گھر روانہ کیا جارہا ہے۔