رواں ہفتے لکھنؤ سے موصولہ اطلاعات کے مطابق ہاٹ اسپاٹ علاقوں سے تعلق رکھنے والے دودھ کے ڈیری آپریٹر کے ساتھ پھل فروش میں کورونا انفیکشن کی اطلاعات موصول ہوئی ہیں جس کے بعد انتظامیہ میں ہلچل مچ گئی ہے۔
ہاٹ اسپاٹ علاقوں میں ضروری سامان کی ڈور ٹو ڈور فراہمی کرنے والے تمام لوگوں کو چیک کرنے کے احکامات جاری کردیئے گئے ہیں۔
انتظامیہ کے حکم کے بعد محکمہ صحت نے ہاٹ اسپاٹ کے علاقوں میں دودھ کی فراہمی کرنے والے چالیس سے زائد دودھ والوں کو کچہری احاطے میں طلب کیا اور ان کو نمونے جانچ کے لئے بھیجے گئے۔
ڈسٹرکٹ فوڈ سیفٹی آفیسر ونود کمار کے مطابق ہاٹ اسپاٹ علاقوں میں خدمات انجام دینے والے لوگوں کی جانچ ضروری ہے، کیونکہ وہ متاثرہ علاقے میں مستقل گھوم رہے ہیں۔
ضروری خدمات سے وابستہ افراد شہر کے مختلف علاقوں میں جارہے ہیں، لہذا ان سے یہ انفیکشن پھیلنے کا خطرہ ہے۔
انتظامیہ آئندہ دنوں میں دیگر خدمات میں مصروف افراد کے نمونے جانچ کے لئے بھیجے گی۔
